Aydar: Wext wextê azadkerdişê Rayber Apoyî yo

Endamê Konseya Rayberdişî ya KCKyî Zebeyîr Aydarî îfade kerd ke PKK ganî lîsteya terorî ra bêro vetene û vat: ''Wext wextê azadkerdişê Rayber Apoyî yo. No hînî wina dewam nêkeno.''

Endamê Konseya Rayberdişî ya KCKyî Zebeyîr Aydarî paytextê Swêdî  Stockholm de temsîlkaranê partîyan ê sîyasîyan, rêxistinanê komelê sivîlî, endamanê çapemenîye û temsîlkaranê dezgehanê kurdan reyde pêvînayîşî kerdî.

Aydarî ANFyî rê qisey kerd û pare kerd ke înan  seba ke PKK lîsteya terorî ra bêro vetene û paştî bêro dayene kampanyaya azadîya Rayberê Şarê Kurdî Abdullah Ocalanî tay pêvînayîşî kerdî.

Qiseykerdişê Aydarî ra beşêk wina yo:

''Lîsteya terorî ra ya Ewropa destê Erdoganî kena bihêz. Bi nê hawayî bingeyê hêrişê vera kurdan virazîyeno. Ma wazenê ke PKK lîsteya terorî ra bêro vetene. Dosyaya Palmeyî zî ameye eşkerakerdene. Wextê kişîyayîşê Palmeyî de operasyonê vera kurdan dîyabî destpêkerdene. Seke kurd ê Ewropa wina verê kurdan de têgêraye. Kurdî bîyî mexdûr. Seba ke no mexdûrîyet bêro telafîkerdene ganî PKK lîsteya terorî ra bêro vetene.

AKP û MHPyî dîktatorîye naye ro. Her kes tepişenê, erzenê zîndanan, dew û şaristananê ma vêşnenê, Rojawan îşxal kenê, Başûr danê bombayan ver. Dima zî ma rê vanê terorîst. Îqtîdar na lîsteya terorî seba hêrişanê xo keno bahane. Seba ke PKK lîste ra bêro vetene ma xeylêk têkoşîno huqûqî kerd.Ma gêrenê edaletî. Ma do teqez ser bikewê û PKK do lîste ra bêra vetene.

Ganî na babetîû babeta azadîya Rayber Apoyî pîya bêrê ercnayene. Rayber Apo seba kurdan haştîye awan keno. O muxatabo verên o la 21 serrî yo ke binê tecrîdî de yo. Kurdan û dostanê ci seba Rayber Apoyî kampanyayêke kenê. Wextê ci ameyo ke Serek Apo bêro azadkerdene. Hêrişê vera ey hêrişê vera ma yo. Azadîya Serek Apoyî azadîya ma ya. No tecrîd hînî wina dewam nêkeno. Ganî azadîya Serek Apoyî sey azadîya şexsêkî nêra dîyene. Azadîya ey ma pêro eleqedar kena.Seba haştî û demokrasî ganî azad bibo. No wezîfe wezîfeyo exlaqî, sîyasî û merdimîye yo.''