Bi vengdayîşê Hemserekîya Dîwanê KCDK-E meydanê Alexanderplatzî yê paytextê Almanya Berlinî de perey çalakîya roniştişî ameye destpêkerdene ke do panc rojan de gruba newîye dewr bigero.

Çalakîye de Macît Hesoyî bi nameyê KNKyî qisey kerd vat: ''Embazê ma zîndanan de grevê vêşanîye de yê. Ma zî semedê paştdayîşê înan tîya yê. Rayber Abdullah Ocalano ke tim hetê haştîye de yo binê tecrîdî de yeno tepiştene ke no nîno qebulkerdene. Ma vera tecrîd û polîtîkayanê îmha ê rejîmê Erdoganî tim meydanan de yê. Xoverdayîşê ma do dewam bikero.''

Hunermend Hozan Aydin zî tepişteyê sîyasîyî selam kerdî û vat ê paşt danê xoverdayîşê înan.

Bi nameyê FED KURDî Mehtap Erol zî vist vîrî ke bi mîlyonna kesî wazenê ke tecrîdê serê Rayberê Şarê Kurdî Abdullah Ocalanî bêro wedaritene û vat ê do heta wedaritişê tecrîdî kuçeyan de bê.

Roja hîrêne ya çalakîye bi govendan qedîyaye.