Heqê hêvîye ser o Weqfa Cigêrayîşê Huqûq û Komelkîyan (TOHAV) zî muracatê Komîteya Wezîran a Konseya Ewropa kerd. Endama Heyetê Rayberdişî yê TOHAVî Avûkate Ayşe Bîngol Demîr bira komîte ya heqê hêvîye ya serê Rayberê Şarê Kurdî Abdullah Ocalanî, Hayatî Kaytanî, Emîn Gurban û Civan Boltanî ANFyî rê ercnaye.

Goreyê Demîre Komîteya Wezîran a Konseya Ewropa bira seba destpêkerdişê prosesê kontrolkerdişî ya serê tecrîdê vera Ocalanî, teqîbê biranê Mehkemeya Heqanê Merdiman a Ewropa (MHME) nêdaye û vat têna başe ante muracatê MHME ser.

Ayşe Bîngol Demîr vat: ''Komîte na babete de tesbît kerd ke MHME û CPT dewre de yê, prosesê kontrolkerdişî nê aktoran rê verda. Komîte eşkayêne tecrîdê Îmraliyî kontrol bikera. Nê prosesî de rolê CPTyî cîya yo, rolê MHME cîya yo, rolê Komîteya Wezîran cîya yo. Tîya de rolêko girîng ê Komîteya Wezîran estbi. Mi çimî de eke şert û mercê tecrîdî bivurîyê, avûkatê Ocalanî û rêxistinê komekê sivîlî asta komîte de eşkenê xîretanê xo rê dewam bikerê. CPT, MHME û Komîteya Wezîran ganî birêka winasêne bigêrê ke pêro waran rê tesîr bikera. Bêguman seba vergirewtişê îşkenceyî CPT wayîrê rolêkê girîngî yo. No seba Îmraliyî derbaz beno.''

Ayşe Bîngol îfade kerd ke Tirkîya de atmosferêko polîtîko ke bira Komîte tede bêra caardene çin o û vat: ''Nika welat de krîzêko pîl ê heqanê merdiman esto. La ez vana qey komîte reyna zî tay tedaya hukmatî bikera. Eke hukmat weçînayîş de bivurîyo o çax tay gamî seba caardişê biran bêrê eştene. Çunke seba caardişê nê biran verî ganî atmosfero sîyasî bivurîyo.''