Înîsîyatîfê Kurdîstan de Vera Şuxulnayîşê Kîmyewîyan (İnitiative Against Chemical Weapons İn Kurdistan) Unîversîteya Cenevre de konferans organîze kerd. Konferans de veng dîya rayapêroyîye ke wa vera hêrişanê kîmyewîyan ê Tirkîya bêveng memano.

Parlamentera Koalîsyonê Çepgerî ya Radîkalî EAG Stéfanie Prezioso, Wekîlê Federalî  û Vervatoxê Grûba Dostîya Kurdan a Parlamentoyê Swîsre Carlo Sommaruga, Dr. Abbas Mansouran Başûrê Kurdîstanî ra bi telkonferansî û bi nameyê Merkezê Komelê Demokratîkî yê Kurdan Ramazan Baytar sey qiseykerdoxî tewrê konferans bîyî. Yew vîdeoyo ke Herêmanê Pawitişî yê Medya ra şawîya o zî dîya seyrkerdene.

Dr. Abbas Mansouranî vat: ''Ma sere de Til Temir û Hesekê xeylêk waran de cigêrayîşî kerdî. Cigêrayîşan de şuxulnayîşê çekanê kîmyewîyan vejîya werte û ame belgekerdene. Ma nê belgeyî Paris de bi konferansêk Neteweyanê Yewbîyayeyan û Rêxistina Qedexekerdişê Çekan ê Kîmyewîyan (OPCW) reyde pare kerdî.''

Carlo Sommarugayî zî bale ante ser ke Tirkîya têna derheqê çekanê kîyewîyan de yena hîşyakerdene û vat: ''Dormeyê mîyanneteweyî nêşinê Tirkîya ser. Vera kurdan sûc yeno kerdene la welatê dinya bêveng ê. Na bêvengîye nîna qebulkerdene.''

Stéfanie Prezioso ard ziwan ke welatê Ewropa semedê karanê xo yê bazirganîye vera sûcanê şerî û merdimîyê bêveng ê û vat ê do vera na bêvengîye têkoşîn bikerê û ramojê pêrune ke şarê kurdî têna nîyo.

Ramazan Baytarî zî vist vîrî ke rixmo ke sûcê şerî yê vera kurdan ameyo îspatkerdene semedê vergirewtişê nê gamêke nîna eştene.

Pierre Peatelliyî ke ANFyî rê qisey kerd vat ê do teşhîrkerdişê dewleta tirke rê dewam bikerê.