Şaristanê Cenevre yê Swîsre de 25ê çeleyê 2021î ra nata her çarşeme seba azadîya Rayberê Şarê Kurdî Abdullah Ocalanî verê Ofîsê Neteweyanê Yewbîyayeyan (NY) de çalakîya roniştişî yena kerdene.

Vizêr zî çalakîya roniştişî dewam kerd.

Çalakîye de nameyê komîteya çalakîye ser o Veysel Dalgiçî qisey kerd û dîyar kerd ke hîrê serran ra nata Rayberê Şarê Kurdî ra xeberêke nêna girewtene. Dalgiçî bale ante Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û îfade kerd ke ganî pêro kurdîstanijî wayîrê na hemle vejîyê.

Dalgiçî vat: ''Bi na wesîle ma ancî venga CPT, NY û dezgehanê bînan danê ke seba wedarîyayîşê tecrîdê Îmraliyî cade têbigêrê. Heta Rayber Apo azad bibo têkoşînê ma do dewam bikero.''

Qiseykerdişî ra dima çalakîye dewam kerd.