Dozgerîya Federale ya Karlsruhe roja çarşemeyî dîyar kerd ke cinîyêke û mêrdeyê ci bi gumanê hêrişê cînsî yê vera di domananê êzidîyan û kolekerdişê înan başûrê Almanya de tepişîyayê.
Dozgerîya Federale ya Karlsruhe bi eşkerayîya çapemenîye da zanayene ke camêrd Twana H.S. û cinîya ci Asîa R.A. mabênê 2015-2017î de Iraq û Sûrîye de endamê DAÎŞî bîyê. Dozgerîye pare kerd ke înan 2015 de domanêka êzidî ya 5 serre û dima zî domanêka êzidî ya 12 serre kerdî kole.
Dozgerîye vat: ''Twana H.S.yî zaf reyî tecawuzê wird domanan kerd. Asia R.A. zî oda amade kerde û domanan rê meqyaj kerd. Nê wirdemînan zî goreyê keyeyî û weyekerdişê domananê xo bi domananê êzidîyan kerdêne. Domanê êzidîyî bi zorî goreyê Îslamî têgêrayêne. Domanan şîdeto fîzîkî yo giran zî dî.''
Dozgerîye dîyar kerd ke 2017 de wird domanî hetê Twana H.S. û Asia R.A. ra teslîmê endamanê DAÎŞî yê bînan ameyê kerdene.
Twana H.S. û Asia R.A. roja sêşemeyî Regensburg û Roth de ameybî destbendkerdene û 10ê nîsane de zî bi bira mehkeme tepişîyayî.
Tebaxa 2023yî de cinîyêka almana ke endama DAÎŞî bîya Almanya de cezaya zîndanî ya 10 serran girewtbî.
Meclîsê Federalî yê Almanya çeleyê 2023yî de sûcê vera êzidîyan sey jenosîdî qebul kerdbî.
