Kurdî û dostê înan 16ê teşrîna peyêne de Koln de tewrê çalakîyanê seba azadîya Rayber Apoyî bibî. Nînan ra ciwananê enternasyonalîstan Min Sommer û Sarah Berg ajansê ma rê qisey kerd.

Cinîya ciwane Min Sommer ard ziwan ke Rayber Apo 26 serrî yo binê tecrîdî de yo û vat: ''No pêro qanûnanê mîyanneteweyîyan binpay keno. Hukmatê Almanya û Yewîya Ewropa na babete de çîyêkî nêkenê. Ganî Tirkîya goreyê peymananê çekan têbigêra. La seba ke şîrketê almanî çekan roşenê Tirkîya dewleta almanan zî dirîtîye kena. Ganî rayaumûmîya mîyanneteweyîye û Almanya seba azadîya Ocalanî cade debikewê dewre.''

Cinîya ciwane Sarahe Berg vat: ''Ma seba azadîya Ocalanî tewrê nê çalakîyan bîyî. Ma tecrîdê Îmraliyî şermezar kenê. Seba ma enternasyonalîstan estbîyayîşê Abdullah Ocalanî û azadîya ey hêvîyêka pîl a. Fikr û felsefeya Rayber Apoyî hêvî danê ma. Ganî seba azadîya Ocalanî ma pîya têkoşîn bikerê û waran de bibê.''