KCKyî û KJKyî mesajê xo şawitî Festîvala Kultur û Hunerê Kurdan a Frankfurtî û bale ante ser ke ganî Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' bêra servistene.

Mesajê Hemserekîya Konseya Rayberdişî ya KCKyî sîyasetmedar Necdet Atalayî wend. 

Mesaj de girse ame selamkerdene û wina ame vatene: ''Ma sey têgêrayîşêkî prosesêkê giranî ra derbaz benê. Hêrişê îqtîdarê AKP-MHPyî yê ke paştîya xo teknîkî ra gênê hetê gerîlayan ra yenê pûçkerdene. Têkoşînê gerîlayan îqtîdar ardo verê rijîyayîşî. Xoverdayîşê Îmraliyî yê Rayber Apoyî û ê gerîlayan rijîyayîşê faşîzmî lezî kerd. Dewleta tirke ya ke bin kewena, bi destekê PDK û Iraqî kena ke hêrişanê xo yê îşxalî de netîce bivisna destî. La ma hêzêkê têkoşînê winayênî yê ke 50 serrî yo bêmabên xo ver danê. La têkoşîn teyna bi ê gerîlayan nêbeno. Seba ney zî Rayber Apoyî stratejîya Şerê Şarî yê Şorişgêrî aver berd. Yanî ganî pêro şarê ma xo rêxistin bikero û tewrê şorişî bibo. Warê Ewropa ganî bibo penceraya têkoşînê ma. Hemleya Azadîye de rolo merkezî dîya şarê ma yê Ewropa. Ma pê bawer ê ke şarê ma û dostê ma do na Hemleya Azadîye ya globale bêmabên bîyarê ca û ser bivisnê. Ewropa seba awankerdişê yewîya neteweyîye zî wayîra bingeyêkê girîngî ya. Ma pê bawer ê ke şarê ma yê Ewropa rolê xo yê seba caardişê yewîye bikero. Ewropa de binge û îmkanê averberdişê ziwan û kulturê kurdan zî est ê. Şarê ma yê Ewropa ganî keye û dezgehanê xo de bi ziwanê xo yê kurdkî qisey bikerê, biwanê û binusê. Ma bi bawer ê ke şarê ma yê Ewropa babeta estbîyayîş û averberdişê kulturî de her wextî ra zafêr hîsger bibo. Ma şima rê serkewtiş wazenê.''

Mesajê Koordînasyonê KJKyî wina yo: ''Ma prosesê têkoşînêkê tewr zixmî de yê. Gerîlayî bi xoverdayîşê xo nê têkoşînî rê serkêşîye kenê. Ma xoverdayîşê gerîlayan û şexsê beşdaranê na festîvale de xoverdayîşê şarê ma selam kenê. Seke zanîyeno Rayber Apo binê tecrîdêkê sîstematîkî de yo. Bi nê tecrîdî yeno waştene ke kurdî bêrê qirkerdene û Kurdîstan bêro îşxalkerdene.Azadîya Rayber Apoyî do biba şikîyayîşê kilîdê hêrişan û îşxalî. Coka ganî ma Hemleya Azadîye ser bivisnê. Heyf ke ewro PDK serkêşîya xeta îxanetî keno.Armancê tecrîdî, îşxal û îxanetî yo bîn zî astengkerdişê têkoşînê cinîyan ê kurdan o. Serkêşîya cinîyan ê kurdan sîstemê serdestîya camêrdan tersnena. Bi na wesîle ma serrgêra diyîne ya qetilkerdişê ci de Jîna Emînî bi rêzî yad kenê. Ma xoverdayîşê Pexşane Ezîzî, Werişê Muradî û Nergîze Muhamedî selam kenê. Ma venga pêro cinîyan danê ke Vakurî ra heta Rojhelatê Kurdîstanî, Başûrî ra heta Rojawanê Kurdîstanî xoverdayîş û têkoşînê xo pîlêr bikerê. Ma venga pêro dewletanê Ewropa û hêzanê mîyanneteweyîyan danê ke nêbê hemkarê polîtîkayanê dewleta tirke ya faşîste. Ma ancî şima selam kenê û vanê; Azadîye do ser bikewa!''