Partîyanê sîyasîyan ê Almanya ra Dîe Parteî, Heyva Sor a Kurdistanî rê 250 hezar Euro hetkarîya pereyî da. Serekê Pêroyî yê Partîye Martîn Sonnebormî çeko sembolîk verê bînaya CDU de teslîmê selahîyetdarê Heyva Sore kerd.
Partîyanê sîyasîyan ê Almanya ra Dîe Perteî (Partî) ya ke Parlamentoyê Ewropa de têna bi di parlamenteran yena temsîlkerdene, dima ke Dewleta Tirkan 9ê teşrîna peyêne de verba Vakur û Rojhelatê Sûrîye dest pê hêrişan kerd kampanyaya hetkarîye dabi destpêkerdene. Dîe Parteî soz dabi ke dezgehê Kurdan rê hetkarîye bike.
Dîe Parteî butçeyê xo ra zî zêdêr hetkarîye kerde û çend roje verê cû 250 hezar Euro hetkarîye erşawite hesabê Heyva Sor a Kurdistanî. Serekê pêroyî yê partîye Martîn Sonnebornî zî seba ke tewirê Almanya ya verba hêrişanê îşxalkarîye şermezar bike, verê merkezo pêroyî yê Partîya Yewîya Demokratîkan ê Xiristîyanan (CDU) de çeko sembolîk teslîmê xebatkaranê Heyva Sor a Kurdistanî Muharrem Aralî û Vahdettîn Kiliçî kerd. Kiliçî seba hetkarîye Sonnebornî rê sipas kerd.
