Xeylêk şaristananê Ewropa de bi wesîleya 1ê Êlule Roja Haştîye ya Dinya çalakîyî ameyî kerdene û hêrişê delweta tirke ya îşxalkere ameyî şermezarkerdene.

Şaristanê Kolnî yê Almanya de çalakîya rayraşîyayîşî û mîtîngî ameyî kerdene. Çalakîye de nameyê Merkezê Komelê Demokratîkî yê Kurdan ser o eşkerayîyêke ameye wendene û bale ameye antene hêrişanê dewleta tirke yê vera Rojawan û Başûrî ser.

Munih de komanê çepgîran ê almanan û kurdan çalakîyê mîtîngî û rayraşîyayîşî kerdî. Çalakîye de hemkarîya Almanya ya bi dewleta tirke ameye şermezarkerdene û xoverdayîşê gerîlayan ame selamkerdene.

Şaristanê Baselî yê Swîsre de serkêşîya Yewîya Hêzê Demokratîkî ya Ewropa (ADGB) de çalakîyêke ameye kerdene. Çalakîye de veng dîya ke verê hêrişanê dewleta tirke ya îşxalkere bêrı girewtene.

Hamburgê Almanya de rayraşîyayîşêk ame kerdene. Rayraşîyayîş de kurdîstanijan fotografê Hakan Arslano ke esteyê ci zereyê yew tewreyî de dîyabî babîyê ey, ameyî berzkerdene.