Seba ke tecrîdê vera Rayberê Şarê Kurdî Abdullah Ocalanî biqedo û azadîya ey bêra caardene kurdî û dostê înan verê Konseya Ewropa ya Strasbourgî de ameyî pêser înan mîtîngêk kerd. Mîtîng de dowîz û pankartê sey ''CPT cade şoro Îmrali'' ameyî akerdene û sloganî ameyî vatene. Wekîlê DEM Partî Omer Ocalan, wekîlê parlamentoyanê Fransa û Îtalya û avûkatê ronayoxê WikiLeaksî Julian Assange zî tewrê mîtîngî bîyî.

Destpêkê mîtîngî de eşkerayîye ameye dayene û ame vîrvistene ke Raybê Şarê Kurdî ra hîrê serrî yo xeberêke nêna girewtene. 

Mîtîng de xeylêk kesan qisey kerd.

Hemserekê Meclîsê Şarî yê Strasbourgî Fîkret Çelîkî vat: ''Hinî wextê azadîya Rayber Apoyî ameyo.''

Hemsereka KCDK-E Zubeyde Zumrut vat: ''Heta ke azadîya Rayber Apoyî bîyarê ca ma do têkoşîn bikerê.''

Hemserekê KCDK-E Engîn Severî vat: ''Çew nêeşkeno serê Rayber Apoyî ra hesabanê xo yê gemarinan bikero.''

Dima hunermend Dîyar Dêrsim vejîya sehne ser.

Mîtîng de vera seba azadîya Ocalanî sloganî û sloganê sey 'Jin, Jiyan, Azadî' ameyî vatene.

Nameyê TJK-E ser o Kezbane Dogan mîtîng de venga Komîteya Vergirewtişê Îşkenceyî (CPT) û Konseya Ewropa da ke wa vera tecrîdî erkanê xo bîyarê ca.

Hemsereka KNKyî Zeynebe Murad bêvengîya Konseya Ewropa û CPTyî şermezar kerde û vat ke şarê kurdî hinî do na bêvengîye qebul nêkero.

Dima hunermend Sîdar Amed vejîya sehne ser.

Endamê Parlamentoyê Ewropa û Parlamentoyê Îrlanda Thomas Pringleyî mîtîng de dîyar kerd ke dewleta tirke seba ke Ocalanî ra tersena ey tecrîd kena.

Wekîlê DEM Partî Omer Ocalanî mîtîng de ard ziwan ke ganî heta ke netîce bêra girewtene wa têkoşînê seba azadîya Ocalanî dewam bikero. Omer Ocalanî vat: ''Konseya Ewropa û CPT verê zulmî de bêveng ê. Ma weşîya Birêz Ocalanî ra qerqilîyenê. Hîrê serrî yo ey ra xeberêke nêna girewtene. Dezgehê Ewropa ganî verê şantajanê dewleta tirke de bêveng nêbê.''

Avûkatê Assangeyî mîtîng û îradeyê kurdan selam kerdî û vat ke ganî Abdullah Ocalan azad bibo.

Wekîlê Fransa Emmanuel Fernandesî zî da zanayene  ke ê tim hetê têkoşînê kurdan de yê û ganî çepgîrî seba azadîya Ocalanî têkoşîn bikerê.

Dima hunermend Kawa Urmîye vejîya sehne ser û mîtîng qedîya.