Festîvala Kulturê Dêrsimî ya Ewropa ya 13. do 26-27ê gulane de, şaristanê Frankfurtî yê Almanya de bêra kerdene. Festîvala ke do Rebstockpark de bêro kerdene do di rojî dewam bikero.

Roja verêne de  bi babete “Wa dewleta tirke qirkerdişan reyde bêra têrî! Bedilnayîşê Demografîkî Vindarne” panel bêro kerdene.  Panelo ke moderatorîya ci do Sevda Guney bikero Endama Komîteya Jîneolojî Haskare Kirmizigul, Niştox Turabî Saltik û Cigêrayox Îmam Canpolat do sey qiseykerdoxan tewrê ci bibê. Saetanê şanî de zî bi tewrbîyayîşê Didare Ana û Pir Huseyin Yagmur do Cem bêro ronayene.

Roja diyîn a festîvale zî do bi panelî dest pêbikero. Panelo ke moderatorîya ci do Hulya Şimşek bikero Cigêrayoxe Nezahate Dundogdu, Têgêrayîşê Cinîyan ê Kurdan ra Besime Konca û Perwerdekare Inci Kaya do sey qiseykerdogan tewrê ci bibê. Saete 13.00 de programê sehne do bi gulbangî dest pêbikero. Wekîlê Partîya Çep a Keske, îdarekarê komeleyanê elewîyan ê Ewropa û Şaredarê Frankfurtî sey qiseykerdoxan sehne de cayê xo bîgêrê. Hunermendî Ayfere Duzdaş, Ferhat Tunç, Huriye Ahuzar, Grup Munzur, Ozan Rencber, Leyla Soysuren, Hasan Saglam, Ozan Serdar, Umuda Haykiriş û Arêyê Kay zî bi deyîranê xo reng bidê festîvale. Reyna do pêramotişê resîman zî festîval de cayê xo bîgêro û xeylêk niştoxî xeyman de wendoxanê xo reyde bêrê têhet. Rîyê erdlerzî ra do emsem festîval de veyveyê Dêrismî mero kerdene. Qezencê festîvale do mexdûranê erdlerzî rê bêro şawitene. Semedê domanan zî do cayo taybet bêro amedekerdene.

Hemserekê FEDA Demîr Çelîkê ke derheqê festîvale de ajansê ma rê qisey kerd, veng da heme dêrsimijan û dostanê înan ke wa tewrê festîvale bibê. Demîrî wina vat: “Êyê ke dûrî ra yenê, seba ke ma ameyîşê înan rehet bikerê wesayîtê taybet û komresî hazir kerdî. Kam wazeno bêro wa xo biresno komele û dergahanê ma. Seke yeno zanayene  kurdî û elewîyî komelê teberê dewlete û îqtîdarî yê. Ziwan, kultur û bawerîya ci ameyî înkarkerdene û raştê qirkerdişan ameyî. Semedê hesabpersayîşî gerek ma têkoşînê rêxistinkerdişî rayra berê û paştîdayîşî xurtêr bikerê. Dewlete û îqtîdar waştişanê ma yê bingeyînan înkar kenê û dej û zilmanê neweyan kenê. Dewlete gerek qirkerdişanê xo reyde bêro têrî. Ma Festîvala Dêrsimî de bêrê têhet û wayîrê heqanê xo bivejîyê waştişanê xoreyna bi vengê berzî bîyarê ziwan."