Sosyolog û Fîlozofê fransizî yê 103 serrî Edgar Morinî derheqê têkoşînê azadîye yê şarê kurdî û Rayberê Şarê Kurdî Abdullah Ocalanî de cewab da persanê ajansê ma.

Morinî îfade kerd ke bingeyê meseleya kurdan de parçekerdişê Kurdîstanî est o û vat: ''Çar parçeyanê Kurdîstanî de heqê neteweyî, etnîk û kulturelî yenê binpaykerdene. Seba ke meseleyê sey ya kurdan nênê çarekerdene ewro şerî hema zî dewam kenê. Her çiqas tay parçeyan de kurdî wayîrê statuyî bibê zî parçeyanê bînan ê sey Tirkîya de kurdî binê zulmî de yê.''

Morinî nêzdîbîyayîşê hêzanê Ewropa yê serê şerê Kurdîstanî û têkoşînê azadîye yê kurdan ercnayî û vat: ''Hêzanê Ewropa qetî îhtîyacê kurdan ê neteweyîyî nêgirewtî verê çiman. La înan seba menfaetanê xo şerê vera DAÎŞî de paştî daye kurdan.''

Morinî bale ante ser ke PKK mîyanê ''lîsteya terorî'' ya Yewîya Ewropa de yo û vat: ''Pênaseyê terorîstî haştîye rê xizmet nêkeno. Ganî şert û mercê komelêkê mîyanneteweyîyî bêrê caardene. La ma nê perspektîfî ra dûr ê.''

Morinî ard ziwan ke Rojawanê Kurdîstanî bi îlhamê paradîgmaya Rayberê Şarê Kurdî Abdullah Ocalanî sîstemêko ekolojîk, demokratîk û azadîgirê cinîyan awan kerdo û vat: ''Tecrubeyê Rojawanî seba dinya nimûneyê vurîyayîşî yê ke ganî her ca de bêrê şinasnayene û vila bibê.''

Morinî girîngîya Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' viste vîrî û vat: ''Ganî ma seba kurdan û Rayberê înan Abdullah Ocalanî têkoşîn bikerê û destek bidê na hemle. Ganî hêzê haştîye seba çareserîya meseleya kurdan têbigêrê. Ganî dewleta tirke rê teda bêra kerdene ke tecrîdî wedarna. 

Têkoşînê azadîye yê kurdan ganî her ca de destek bivîno. Ez heyrana têkoşînê kurdan a. Têkoşînê azadîye yê kurdan dewayêka heqdar a. Seba ke şarê kurdî zaliman ra bixeliso, ganî konjekturo tarîxî bêro vurnayene. Ganî na raştîye û têkoşînê kurdan nêrê vîrakerdene.''