Rojnameger, sînemager û şerwanê YPGyî Mehmet Aksoy (Firaz Dag)o ke Reqa de 26ê êlula 2017î de hêrişê DAÎŞî de şehîd bibi London de ame yadkerdene. Embaz, keye, hemra û merdimê Dagî Goristanê Highgate yê Londonî de kom bîyî û înan vilî gorê ser de nayî ro.

Dima bînaya KCCyî ya Haringe de merasîmê yadkerdişî ame kerdene. Merasîmî pê deqayêkê rêzgirewtişî û merşê Ey Reqîbî dest pêkerd.

Endamê Komîsyonê Keyeyanê Şehîdan Alî Poyrazî merasîm de qisey kerd û vat: ''Xeyal û îdealê embaz Mehmetî pîl bîyî. Ewro zî semedê nê îdealan têkoşîn yeno kerdene.''

Dima sînevîzyonêk ame mojnayene û dima Mark Campbell, nameyê Têgêrayîşê Şorişê Yewbîyayeyî Hêlîne Pekoz ser, nameyê MLKPyî Huseyîn Îmamî ser û nameyê şarê Kurecîkî ser o zî Hanime Hevale qisey kerd. Qiseykerdişan de qala têkoşînê Firaz Dagî ame kerdene.

Dima hunermend Alî Sîzerî deyîrî vatî.