Alî Akyuzo ke babîyê di şehîdan o şaristanê Dresdenî yê Almanya de ajansê ma rê qala di lajanê xo Delîl (Agir Adar) û Ahmet (Bawer Agir) kerde ke pîya tewrê gerîlayan bibî. 

Alî Akyuzî verî qala keyeyê xo kerde: ''Ez dewa Xanika Jerî ya qezaya Çinarî ya Amedî ra ya. 8 domanê mi estê; di lajê mi şehîd bîyî, 3 domanê mi zewijnaye yê. Cinîya mi zî  Hemsereka Komeleya Keyeyanê Şehîdan a. Erdê ma esto, ma ey çinenê û pê debara xo kenê. Dima ke ceza dîyaye mi ez ameya Almanya. Çend aşmî yo ez tîya de surgun de ya.''

Alî Akyuz Dresden de pê ked û fedakarîya xo şinasîyeno. Xalê Alîyî vat: ''Dima ke ez teqawut bîya mi giranîye daye xebatanê sîyasîyan. Dima ez tepişîyaya û mi ceza girewte. O çax ez welatî ra vejîyaya. Tîya de zî destê mi ra çita bêro ez do bikera. Ez do qetî têkoşînê domananê xo ra fek vera nêda. Lajê mi 2016 de şehîd bi. Ma gorê ci viraşt, serê gorî de zî şîîra ke wasîyetê ci bibi nuşt. Gorî ra 2020 de vera mi dewa ameye akerdene. Înan îtîrafker zî dî. Goreyê înan eke yew merdim seba înan nêxebito terorîst o.''

Ahmet û Delîl 2010an de Anqara de mîyanê wendekaranê welatperweran de hol şinasîyayêne. Ahmetî seba ke beşê Rayberê Şarê Kurdî bi Fakulteyê Sîyasalî yê Anqara weçînabi. Ahmetî 2011 de çalakîya vera Qirkerdişê Roboskî rêxistin kerde, coka 103e çeleyê 2012î de tepişîya.

Xalê Ahmetî wina qala Ahmetî kerdêne: ''Ahmet domanîya xo de zî domanêko hol bi û her kesî tira zaf hes kerdêne. Ey Faulteyê Sîyasalî de zî xebatanê ciwanan de ca girewt û o çax tepişîya. Dima ke zîndanî ra vejîya mi pa vat wa zanîngehî biqedîno se keno wa bikero. La ey qebul nêkerd û dest pê xebatanê ciwanan kerd. 3-4 serran ra dima o derbazê Rojawanî bi û vera DAÎŞî şer kerd. 13ê teşrîna verêne ya 2019î de Girê Sipî de şehîd bi. Nika şehîdgehê Kobanê de yo.

Wexto ke Ahmet erzîya zîndanî birayê ci Delîlî zanîngeh war verda û Dîlokî ra şi Anqara. Delîl Anqara de xebitîyeno û şino pêvînayîşê zîndanî. Dima ke Ahmet zîndanî ra vejîya Delîlî ci rê vano ke o do tewrê gerîlayan bibo. La Ahmetî zî bira tewrbîyayîşî girewtbî. Înan yewbînan rê vat: ''Ganî ez tewr biba'' û peynî de ê pîya tewrê gerîlayan bîyî.

Xalê Alîyî derheqê bira tewrbîyayîşê domananê xo de wina vat: ''Înan pîya bire girewtbî la ma nêzanayêne. Rojêke ma hînî nînan ra xebere nêgirewte. Ez û cinîya mi ma şîyî Anqara, gêrayî înan. Wirdêmînî ameyî verê ma, înan vat hînî yew gureyê înan bi ma çin o, wa ma nêgêrê înan. Ma zî sey înan kerd. Mi Delîlî ra zaf hes kerdêne, tim waştêne wa o mi hetî de bibo.

Wexto ke 2015 de Gever de rayberîya YPSyî de xoverdayîşê xoîdarekerdişî amebi îlankerdene Delîl zî uca de bi. Wextêk xebatê amadekarîye kerdî, dima zî derbazê Wanî bi. Ey uca de xebata xoserîya demokratîke kerdêne. Gerreyê ci ameyo kerdene. Dima erzîyayo keyeyê ci ser. Delîl uca de şehîd bi. Wayîra ê keyeyî cinîyêka digane bîye, sereştiş de aye zî dinyaya xo bedilnaye.''

Xalê Alîyî da zanayene ke keyeyê ci 'kurdî' yo û mabênê domananê ci de têkilîya way û biratîye nê têkilîya hemratîye esta. ''

Xalê Alîyî qala ci kerde ke wexto ke lajê ci Ahmet zîndan de bi embazê ci Ahmet Temîzo ke cezaya muebede dîyaya ci tira kitabêk wazeno Delîl ci rê ê kitabî peyda keno. O çax Ahmet Temîz vano: ''Ma emser pîyaz ramit. Wa birayê to Delîl wa verê nê kitabî de dewe ra torbayêka pîyazan bigêro.''

Xalê Alîyî vat: ''Ez key a dewe ra yewî bivîna vana ê deyndarê min ê. Ê zî vanê hema wextê ci esto.''