Mizgîn Bîlîne û embazê ci Hamburg de ameyî vîrardene

Gerîlaya YJA Starî Mizgîn Bîlîne (Raperîn Baze) ya ke 13‘ê Êlule de Çewlîg de pîya bi hîrê embazanê xo  pêkewtiş de şehîd kewt, bajarê Hamburgî yê Almanya de ameye vîrardene.

Hamburg de şexsê Mizgîn Bîlîne (Raperîn Baze) de gerîlayê HPG û YJA-Starî yê ke 13‘ê Êlule de Çewlîg de şehîd bibî, ameyî vîrardene. Vîrardişo ke Merkezê Cimatê Kurdan ê Demokratîkî ame viraştene babîyê Bîlîne Sehaladdîn Bilîn, merdimê ci û Hamburg, Bremen û derûdorê bajarî ra xeylî Kurdistanijî tewrê ci bîyî.

Dimayê rêzgirewtişî babî Bîlînî qisey kerd. Bîlînî ard ziwan ke kênaya ci hendê anor û şerefî  berbirsîyarîye zî bare înan kerde û tewrê kerwanê şehîdan bîye. Bîlînî semedê tewrbîyayîşê vîrardişî her kesî spas kerd û vat waştişê ma oyo ke her kes herra xo de azad biciwîyo.

Vervatoxê Komîteya Şehîdan Ayten Dûrmûşe zî qiseykerdişê xo de ard ziwane ke vera zulm û zordarîye Kurdan rê teberê xoverdayîşî de yewna rayîr nêmendo û bale ante muhîmîya Têgêrayîşê Azadîye yê Kurdistanî ser. Dûrmûşe vat birayê mi Mehmet Hayrî Dûrmûş û heme şehîdanê ma seba ke ma sey merdimî biciwîyê zerrîya safî ra ganê xo da. Ganî ewro heme Kurdî dawaya şehîdan rê wayîr bivejîyê.

Merdimê Bîlîne û sîyasetmedarê Kurdan Saît Bîlgînî zî mucadeleyê Kurdan vist vîrî û va:‘‘ Cografyaya ke Bîlîn tede ciwîyayêne demê serewedartişê Şêx Saîdî ra heta ewro qeleya xoverdayîşî ya.‘‘