Endama Meclîsê Cinîyan ê DEST-DANî yê Berlinî Nûjîyane Gunay derheqê Komployê Mîyanneteweyî û tecrîdê vera Rayberê Şarê Kurdî Abdullah Ocalanî û Hemleya Wextê Azadîye de ANFyî rê qisey kerd.

Gunaye vist vîrî ke Komployo Mîyanneteweyî şexsê Abdullah Ocalanî de vera pêro şarê kurdî ame kerdene û vat: ''Hêzanê komplogeran 23 serrî verî wezîfeyê gardîyanîye da Tirkîya û waşt kurdan teslîm bigêrê.  La înan nêva qey paradîgmaya Rayber Apoyî hende vila bena. Merdim eşkeno hînî sîstemê Modernîteya Demokratîke sey sîstemê pêro dinya pênase bikero.''

Gunaye da zanayene ke cinîyî rayberîyê Hemleya 'Wext wextê azadîye yo' kenê û vat: ''Cinîyî bi seserran ameyî qirkerdene û kolekerdene. Cinîyan ê kurdan dima fikrê Rayberîye xo rê sey hêvî dîyî . Coka cinîyî rayberîya Hemleya 'Wext wextê azadîye yo' kenê. Bi nê hemle ma armanc kenê ke azadîya Rayberîye bîyarê ca. Coka ganî her wextî ra zêdêr xo rêxistin bikerê, têkoşînê xo pîlêr bikerê. Ganî ma Rayber Apoyî mîyanê çar dêsan ra vejê û azad bikerê.

Hêzanê komplogeran armanc kerd ke bi teslîmgirewtişê Rayber Apoyî şarê kurdî zî teslîm bigêrê. Bi nê hawayî înan waşt ke kurdan û Kurdîstanî çin bikerê. Şar dormeyê Rayberîye de kom beno û heta azadîya ey têkoşînê xo rê do dewam bikero.''