Mehkemeya herêmîye ya Berlînî qerar da cinîya çeteyêkê DAÎŞ’îijî yê Almanî û 3 domanê înan ê ke kampa Holê ya QSD’yî de yê bêrê ardene bi Almanya. Labelê Wezaretê Karanê Teberî hemverê nê de vejîya.
Seba çeteyanê DAÎŞ’î yê Almanan ke operasyonanê hêzanê YPG/QSD’yî de bi weşî ameyî esîrgirewtene îdareyê Berlînî hewna çareserîyêk nêdîya. Rixmê vengkerdişê serekê DYA Donald Trumpî û îdareyê Rojawanî yê seba ‘peysergirewtişê çeteyan’ hukmato Alman o Federal hewna zî bi bêxemî têgêreno.
Hukmato Alman heman wextî de keyeyê DAÎŞ’ijan ê ke kampanê Rojawanê Kurdistanî de yê û Vakurê Surîye de yê zî qebul nêkeno. Labelê mehkemeyêka herêmkîye ya Berlînî ke halê hemserekê çeteyê DAÎŞ’î û hîrê domananê ê ercna, destpêkê menga Temmuze de qerarêko newe girewt. Qerar de ame vatene ke ganî keyeyê çeteyanê DAÎŞ’î bîyarê Almanya.
Goreyê Qerarî do Almanya Keyeyî QSD’yî ra Biwazo
Keyeyo DAÎŞ’ij ke Eyaletê Saksonyaya Cêrîne ra yo, kampa Holê ya Hesekê de yo. Mehkemeyêka berze zî qerarê herêmkîyî tesdîq kerd. Mehkemeya Îdarî ya Eyaletê Berlîn-Brandenbûrgî qerarê xo de vat, “Ganî her dewlete welatîyanê xo qebul bikero.”
Wezaretê Karanê Teberî Almanya ke goreyê qerarî ganî bi hawayêkê fermîyî keyeyê çeteyê DAÎŞ’î Hêzanê Sûrîyeya Demokratîke (QSD) ra biwaştêne razînêbîyayîşê xo hemverê qerarê mehkemeya berze de ard ziwan. Wezaretî waşt ke tena hîrê domanî bêrê ardene û qerarê derheqê agêrnayîşê cinîya çeteyê DAÎŞ’ijî bêro betalkerdene. Goreyê hayîyanê ke çapemenîya Almanî de ameyî weşanayene, Mehkemeya Îdarî ya Eyaletê Berlîn-Brandenbûrgî nuşteyêko newe Wezaretê Karanê Teberî rê nuşto û waşto heme keyeyê çeteyê DAÎŞ’ijan bêrê agêrnayene. Yeno vatene ke zêdeyê 200 Almanan ke zafaneyê înan cinî û domanê çeteyanê DAÎŞ’î yê destê YPG/QSD’yî de yê. Heman wextî de zêdeyê 2800 çeteyê DAÎŞ‘ijî bi operasyonanê yewîyanê taybetan ê YPG’yî ameyî tepiştene û 800’ê înan welatanê Rojawanî ra yê.
