Dima ke kampa multecîyan a Moria Brenntî ya Yunanîstanî de şewat vejîya xeylêk welatanê Ewropa de bêhîsgerîya vera koçberan ameye protestokerdene. Bajarê Heilbronnî û yê Almanya û bajarê Bern û Baselî yê Swîsre de semedê paştdayîşê koçberan çalakîyî ameyî kerdene.

Heilbronn de çalakîya hetê Cinîyan ê Ciwanan ê Têkoşeran (TEKO-JIN) ra ameyî organîzkerdene rêxitinanê cinîyan ê almanan zî paştî da ci. Qiseykerdişanê çalakî de bale ameye antene şero leymin ê Rojhelatê Mîyanênî yo ke serkeşîya Erdoganî de yeno kerdene, ser û ame vatene ke Ewropa hem paştî dana nê şerî hem zî şaro ke mecbur manano ke rîyê şerî ra erdê xo ra vejîyo, destur nêdana tîya biciwîyo.

Bernê Swîsre de zî çalakîyêke ameye kerdene. Çalakîya ke hetê Stopp İsolation Bern (Îzolasyonî vindernê) ra ameye organîzekerdene xeylêk rêxistinê koçberan tewrê ci bîyî. Çalakîye de polîsan hêrişê çalakwanan kerd.Vera hêrişê polîsan çalakwanan çalakîya bêîtaatîya sîvîle kerde û rayîr qefilna.

Bajarê Baselî de zî bi eynî waştişî nuqtayanê muhîman ê bajarî de pankartî ameyî daliqnayene.