Amîneh Kakabavehe: Her kes hinî Erdoganî ra eciz bîyo

Parlametera Swêdije Amîneh Kakabavehe vat peynîya Erdoganî nêzdî bîya, her kes ey ra eciz bîyo coka wina hêrişê Kurdan keno.

Parlametera Swêdije Amîneh Kakabavehe vat Erdogan wazeno ke bi hêrişan payra bimano, coka hêrişê Kurdan keno la peynîya ey nêzdî bîya, hinî kes ey nêwazeno.

Amîneh Kakabavehe vist vîrî ke Erdogan bi stratejîya HDP û Kurdan 31’ê Adare de binkewt û nê semedî ra bi amancê qesasgirewtişî hêrişê Kurdan keno û va: ‘‘Erdogan HDP û Kurdan sey mesuldarê vînîkerdişê xo hesibneno. Coka bi heme hêzê xo înan rê hêriş keno. Goreyê Erdoganî semebê heme çîyanê nêgatîfan Kurd ê. Ganî Ewropa nê qewimîyayîşan vînê û vera Erdoganî tewir bigêro. Xora Tirkîya de çew nêeşkeno qalê huqûqî bikero. Mehkemeyê bêhetî yê ke xoser qerar gênê çîn ê. Heme mehkemeyî bi talîmatê Erdoganî qerar gênê. Eşkera yo ke bi talîmatê Erdoganî Selahattîn Demîrtaş ame tepiştene. Rixmo ke mehkeme qerarê serbestverayîşî da, Erdogan va‘ Ma nêeşkenê înan veradê ‘ eşkera talîmat da hukmî.Tena nê nimûneyî ganî dinya biwirznaynê payan ser.

Kakabavehe bale ante qeyûmanê ke îqtîdar şaredarîyanê pîlan ê Amed, Wan û Mêrdînî yê HDP’yî de ca kerdî û wina dewam kerd: ‘‘AKP qeyûm nêerzeno bajaranê Tirkîya la Kurdistan de dest nano şaredarîyanê şarî ser. Wazeno ke Kurdan bitersno û peyser game bidê eştene. La şarê Kurdî rixmê heme zextanê înan çok nêdano û semedê wayîrvejîyayîşê îradeyê xo xover dano. Çar leteyê Kurdistanî de şarê Kurdî vera zaliman  milê xo çewt nêkerd û timûtim bi mucadeleyî cewab danê. Hukmatê Tirkî nika zî hêrişê Rojawan û Başûrê Kurdistanî keno. Vera nê hêrişê îşxalî zî Kurdî xoverdayîşêko xurt danê. Pere û silehê Kurdan tay ê la bawerî û felsefeyê înan esto. Serkewtişê înan ê Rojawanî heme dinya dî. Xora Rûsya û Amerîka zî vera tehdît û hêrişanê Tirkîya tewirêko eşkera nêgênê. Erdogan naye ra zî paştî gêno. La Erdogano ke Kurdan rê dişmenîye keno se keno wa bikero peynîya ci bîya nêzdî. Bi zextanê Dewrê Mîyanênî o nêeşkeno payra bimano. Her kes ey ra eciz bîyo. O zî naye zano ke hêrişê Kurdan keno.‘‘