Paytextê Swîsre Bern de hêrişê vera Qamişloyî yo ke Keyeyê Guloyî ra hîrê kesî şehîd bîyî, ame protestokerdene.

Çalakîya ke hetê Merkezê Komelê Demokratîkî yê Kurdan û Meclîsê Cinîyan ê Mizgîne ra ame organîzekerdene merkezê îstasyonê trenî de ameye kerdene. Çalakwananê ke fotografê hîrê welatperweran ê şehîdan kiriştî hêrişê dewleta tirke yê kîmyewîyî yê vera gerîlayan zî protesto kerdî.

Çalakîye şexsê Yusuf Gulo, Muhammed Gulo û Mazlum Guloyî de semedê şehîdanê Kurdîstanî de rêz ame girewtene. Qiseykerdişan de ame vatene ke hedef girewtişê Yusuf Guloyî (82) yo ke hetê şaranê herême ra ameyêne naskerdene û heskerdene, tesaduf nîyo. Çalakwanan ard ziwan ke ê do têkoşînê şehîdan bidê domnayene û veng da dezgehanê Ewropa ke wa wezîfeyê xo bîyarê ca.