Heyetêkê Îdareyê Xoserî yê Rojawanî wekîl û endamanê Senatoyê Îtalya û Têgêrayîşê Panc Estareyan ê Îtalya (MoVimento 5 Stelle M5S) de pêvînayîş kerd. Pêvînayîş bînaya parlamentoyî de paytext Roma de qewimîya.

Heyetê Îdareyê Xoserî temsîlkarê Ewropa Ebdulkerîm Omer, Vervatoxa Yewinanê Pawitişê Cinîyan (YPJ) Rûksene Mihemed û Hemsereka Temsîlkarîya Îdareyê Xoserî ya Swîsre Medya Hesen ra ame pê. Heyetê Îtalya zî Alienza Verdi, Marco Grimaldi, Davis Dore, Francesca Guerra, Tîno Magni, Enzo Amandola û Riccardo Ricciardi ra ame pê.

Pêvînayîş de tecrubeyê modelê Îdareyê Xoserî ame şirovekerdene û ame vatene ke no îdare waştiş û hêvîyanê şaranê herême ra virazîyayo û erjanê cuya hempare paweno.

Heyetê Îdareyê Xoserî bale ante rolê cinîyan ê dezgehanê Îdareyê Xoserî, sîstemê hemserekîye û têkoşînê cinîyan ê vera DAÎŞî ser.

Pêvînayîş de ame parekerdene ke ardimê ke Ewropa ra erşawîyenê teyna resenê Şamî û nêresenê herêmanê Îdareyê Xoserî. Heyetê Îdareyê Xoserî bale ante ambargoyê vera herême ser û rewşa kampanê keye û endamanê DAÎŞî ser.

Heyetê Îdareyê Xoserî vist vîrî ke hêrişê îşxalî yê dewleta tirke vera herême bêmabên dewam kenê û ganî rayaumûmîya mîyanneteweyîye vera  nê hêrişan tewirê xo bimojna.

Heyetê Îtalya zî ard ziwan ke ê qewimîyayîşanê Rojawanî nêzdî ra  teqîb kenê û wina vat: ''Şima îdareyêkê demokratîkî pêşkêşê herême kenê û cayêkê girîngî îdare de danê cinîyan. Ma do hukmat û komelê mîyanneteweyîyî ra biwazê ke wa verê Îdareyê Xoserî de erkanê xo bîyarê ca, ardim bikerê û seba şinasîyayîşê Îdareyê Xoserî xîret bikerê.''