Bi fermanê Wezîrê Karanê Zereyî Horst Seehoferî Weşanxaneyê Mezopotamya û Mîr Muzîk 12’ê Sibate 2019 de ameybî qedexekerdene. Polîsan eynî roje eştîbî serê her di sazgehan û berê sazgehan mor kerdîbî. Serra parî polîsan di reyî eştîbî serê nê di sazgehan û kitabê musnayîşê Kurdkî, kitabê domanan ê bi Kurdkî û kitabê tarîxî zî tede dest naybî serê xeylî kitaban. Sere de Almanya paştdayîşê weşanxaneyanê Ewropayîyan ê Mezopotamya dewam keno.

Bajarê Hambûrgî yê Almanya ra  Unrast-Verlag, Awusturya ra Manelbaum Verlag û Swîsre ra  Edîtîon, nê hîrê weşanxaneyan semedê paştdayîşê  Weşanxaneyê Mezopotamya dest bi kampanyayêk kerde. Kampanyaya ke bi nameyê ‘ Vera sansûrî paştdayîş û projeyê azadîya weşanî’ ameye destpêkerdene de her hîrê weşanxaneyê wazenê ke kitabê Mezopotamya yê ke hetê polîsan ra ameyî destsernayene, newe ra bidê weşanayene. Wêşankaran ard ziwan ke kitabê ke ameyî dest sernayene,înan ra qet kitabêk zî qedexe nêyo û wendoxî ganî nê kitaban ra mehrûm nêmanê.

Her hîrê weşanxaneyan vist vîrê ke  Weşanxaneyê Mezopotamya sere de tarîxê û kulturê Kurdan ziwananê cîya-cîyayan de  eseranê muhîman ê derheqê Têgêrayîşê Cinîyan û Kurdistan, kitabanê Abdullah Ocalanî û kitabanê musayîşî resneno wendoxanê xo û vat: ‘’Kitabê ke hetê polîsan ra ameyî destsernayene tayî ê înan nêyê tena roşenê zî estê. Ma naye ra vanê sansur.’’

Seba ke sansuro ke dewleta Alman bica ana bêro wedartene  çarçeweya projeyê her hîrê weşanxaneyan de tayî eserê muhîmê ke Weşanxaneyê Mezopotamya ra Almankî ameyîbî weşanayene do newe ra bi nameyê “Edîtîon Mezopotamya”  wendoxan de bêrê têhet. Hedefê weşanxaneyî oyo ke nê kitaban biresnê Fûarê Kitabanê ê Frankfurtî yê Mîyannteweyîyî yo ke menga Teşrîna Verêne de do bêro viraştene.

Reyna tewr tay 100 weşanxaneyan, bananê kitaban û dezgehanê medya zî bi deklarasyonêkê hemparî qedexeyê vera Weşanxaneyê Mezopotamya şermezar kerdbi. Deklarasyon de îdarekarê Weşanê Kitaban û Yewîya Komeleyanê Weşangeran (Borsenvereîn) o Alman Chrîstoophs Lînksî derheqê qerarê qedexeyî de vatbi, “No hêrişêkê serê azadîya fikir û weşanî yo ke Almanya de bicaameyîşê ci çîyêko alelade nêyo û nêno qebûlkerdene.” Deklarasyon de bi heman hawayî ame vatene Wezaretê Karanê Zereyî wazeno ke çi têkildarê Kurdan esto înan heminan ra vajo “No PKK’yî dir eleqedar o” û teşebusê wezaretî yê qedexekerdişî, nêno qebûlkerdene.

Kitabheskerdoxî eşkenê nê hesabî ser ra paştî bidê nê projeyî:

Verein z. Forderung kurdischer Kultur e.V. i.Gr.

IBAN: DE78 4306 0967 1011 1214 00

Verwendungszweck: Edition Mezopotamya