Hukmato Federal ê Almanya seba gerîlaya HPG’yije Sarah Handelmanne ya ke Wareyê Pawitişî yê Medya de hêrişê hewayîyî de şehîd bîbî eşkerayî daye. Hukmatê Federalî vat ke hayîya înan hêriş û îşxalê dewleta Tirkî yê Başûrê Kurdistanî ra çina.
Gerîlaya HPG’yije û şerwana enternasyonalîste Sarah Handelmanne a bi nameyê qodî Sara Dorşîne, 7’ê Nîsan a 2019’î de, Wareyê Pawitişî yê Medya de hêrişê artêşa Tirkî de şehîd bîbî. Parlementera Partîya Çepe, Ûlla Jelpke hukmatê Federalî yê Almanya ra persa, tirêm hayîya înan mergê Handelmanne ra esta yan nê.
Jelpke hêriş û îşxalkarîya dewleta Tirkî ya sere Başûrê Kurdistanî de zî persa. Sere nameyê hukmatî sekretera dewlete Ante Leendertse cewab da. Cewab 2’ê Temmuz a 2019’î de ame dayene û hukmatî vat ke hayîya înan mergê Handelmanne ra esta.
Hukmatî vat ke ê do seba ‚qanûnanê pawitişê hayîdarîyanê şexsîyan‘ hîna zaf hayîdarîyan nêdê. Hukmatî vat ke hayîya înan hêriş û îşxalkarîya dewleta Tirkî ya hemverê Başûrê Kurdistanî ra çina.
Jelpke: Îşxal bi Sîlehanê Almanya Yeno Kerdene
Parlementera Partîya Çepe Jelpke hemverê eşkerayîya hukmatî de razînêbîyayîşê xo ard ziwan û vat „Hukmat nêwazeno hayîdarîyanê derheqê şehîdbîyayîşê Handelmanne de eşkera bikero. Tersenê ke bi nê hayîdarkerdişî do têkilîyê înan Tirkîya dir bibê xira.“
Jelpke da zanayene ke rîyê hêrişanê dewleta Tirkî ra herême de 4 kesê sivîlî zî ameyê qetilkerdene û nê hêrişî bi sîlehanê Almanya yenê kerdene. Jelpke bale ante serê nê çîyî ke no hêriş yeno manaya binpaykerdişê erdê Iraqî û waşt ke ambargoyê sîlehan serê Tirkîya de bêro bicaardene.
