Kongreya Komelê Demokratîkî ya Kurdîstanijanê Ewropa (KCDK-E) eşkerayîyêke daye û vat, dîktator Erdogan bi rayîrê parlementerê AKPyî Mustafa Açikgozî bi hewayêko eşkere kurd û muxalîfê Almanya tehtîd kerdî.

KCDK-E vat: ‘‘Açikgozî bajarê Neussî yê Almanya de kombîyayîşêkî de fermanê kiştişî da. Mustafa Açikgozî kombîyayîşî de silamê Erdoganî vatî, seba ney bi haya û xebera ey ameyo. Qiseykerdişê ey ra fam beno ke fermanê kiştişê kurdan û muxalîfê Almanya girewto.’’

Eşkerayîye de ame vatene ke hukumetê Almanya heta nika qanûn û zagonanê xo nê çete û ajananê tirk ê Almanya ver o nêardê bi ca. Coka ewro Mustafa Açikgoz bi eşkere nameyê Erdoganî ser o fermanê kiştişê kurdan û muxalîfan dano.

KCDK-E vat: ‘‘Hukumetê almanî seba ke mesulîyetanê xo nêardê bi ca, dîktator Erdogan bi hewayêko eşkere bi raya çeteyanê xo fermanê kiştişî dano.’’

Eşkerayîye de Qirkerdişê Parîsî ame vîrardene û vajîya, ‘‘Hukumetê ke hemverê nê çîyan de tedbîrê xo nêgênê, cesaret danê dewleta tirk û rayîr akenê seba qirkerdişê kurdan ê Ewropa.’’

Eşkerayîye de venga rayapêroyî, demokrat û sazîyanê averşîyayeyan û hukumetê Almanya dîya, ke peynîya na bêvengîya xo bîyarê, wezîfeyê xo bîyarê bi ca, seba ke vernîya kiştişê kurdan û muxalîfan bigîrê bikewê mîyanê tewgerî.

Eke tehtîdê winasênî bieşkere yenê kerdene û vernîya înan nêyena girewtene, provokasyon yan zî hêrîşê ke hemverê kurdan û muxalîfanê Almanya de benê, mesulîyetê nînan yê hukumetî yo. Seba ke vernîya nê provokasyonan û tehtîdanê hêrîşî bigîrê, ma venga hukumet û sazîyanê eleqadaran danê ke wa mesulîyetê xo bîyarê bi ca.

Bi taybetî ma venga çapemenî û rayapêroyî ya Almanya danê ke wa haya înan têkildarîya rêxistina casûs a dewleta tirk a camî û sazîyan ra biba. Seba ke vernîya qirkerdişê sey Parîsî bigîrê. Bikewê mîyanê tewgerî.