Hetkarê Serekê EDEK (Partîya Sosyalîste) û Parlamenterê Parlamentoyê Ewropa Kostis Efstathiou û Parlamentera heman partîye Eleni Theocharous, Seroko verên ê Partîya Ekolojîst û Parlamenter Giorgos Perdikis, cigêrayox-rojnameger Christos Lakovou zî tede xeylêk sîyasetmedar, rojnameger, nuştox û kesayetê namdarî Kibris da ameyî têher û înan seba yewîya stratejîke ya kurdan û şarê Kibrisî 'Înîsîyatîfê Paştdayîşê bi Kurdan' rona.

Endamanê Înîsîyatîfê Komelê Rojnamegeran ê Lefkoşa dima kombîyayîşê çapemenîye serûber kerd. Temsîlkarê PYDyî Yasîn Dergûş, Hemserek û endamê Meclîsê Şarê Kurdî û sîyasetmedaro kurd Lezgîn Serhat zî tewrê kombîyayîşî bîyî.

Endamê Komîsyonê Paştdayîşê bi Kurdan o ke 1990 de hetê Teofilos Georgiadis ra amebi ronayene zî tewrê kombîyayîşî bi.

Kombîyayîş de parlamenteran qisey kerd û dima çapemenîye rê eşkerayîya hempare ameye wendene.

Vilaweke de ame vatene ke şarê Kurdîstanî û Rojhelatê Mîyanênî prosesêkê tarîxî ra derbaz benê, têkilîyê kurdan-rûman astêka girînge de yê. Eşkerayîye de wina ame vatene: ''Pê têkoşînê hemparî ma pê bawer ê ke zêdêr aver şorê. Têna paştdayîş û hemkarîya şaran eşkenê peynîya nê plananê dewleta tirke û hêzanê hegemonîkan bîyarê. Teofilos Georgiadisî vatêne ke 'azadîya Kibrisî koyanê Kurdîstanî ra derbaz bena.' Ma pê bawer ê ke Înîsîyatîfê Paştdayîşê bi Kurdan do goreyê raştîye vera meseleyanê sîyasîyan, ekonomîkan û kulturelan ê şarê kurdî bi hîsgerî têbigêro.

Înîsîyatîf do seba menfaatanê şarê kurdan û Kibrisî bixebito, yewîya stratejîke awan bikero, seba mexdûranê şerî yê Kurdîstanî hetkarîya madî û komelkîye bikero. Qala paradîgmaya Rayberê Şarê Kurdî abdullah Ocalanî şarê Kibrisî ra do bêra kerdene.''

Kombîyayîş pê sloganan qedîya.