Konseya Rayberdişî ya Kongreya Neteweyîye ya Kurdîstanî (KNK) 11ê kanûne de kombîyayîşêk kerd. Netîcenameyê kombîyayîşî ame eşkerakerdene.

Netîcanameyê kombîyayîşê KNKyî wina yo:

''Vakur

2015î ra nata Vakur de şerêko pîl yeno kerdene ke no şer vilayê Rojawan û Başûrê Kurdîstanî zî bi.  No şer şerê qirkerdişî yo. Hêrişê vera Kurdîstanî, dezgeh û sazgehanê kurdan, partîyanê kurdan û sîyasetmedaranê kurdan normal nîyê. Hişmendîya ewroyîne ya hukmatê Tirkîya hişmmendîya Îtîhat-Terakkî ya. Na hişmendîye rûm, sûryanî, asûrî, aermenîyan dima ewro zî wazena kurdan qir bikera. Coka no şer şerê mergî yo. Rixmê pêro zehmetîyan zî Têgêrayîşê Azadîye yê Kurdan têkoşînî rê dewam keno, gerîlayî xoverdayîşê bêhempayî kenê û şarê kurdî wayîrê îradeyê xo vejîyeno. Dewleta tirke xêrê xoverdayîşê kurdan ra krîz de ya.

Dewleta tirke bi taybetî Metîna, Zap û Avaşîn de vera gerîlayan çeka kîmyewîye xebitnena. Heta nika twr tay 40 gerîlayî bi nê hawayî şehîd bîyî. Pêro dinya de kurdî û dostê înan vera ney nêrazîbîyayîşê xo mojnenê. La dinya bêveng a. OPCW, Neteweyê Yewbîyayeyî bêveng ê. Na babete de wezîfeyê ma yo ke ma tim vera çeka kîmyewîye têbigêrê.

Rojhelatê Kurdîstanî

Rojhelatê Kurdîstanî de asîmîlasyon, hişkerdiş, vêşanverdiş, îşkence û tepiştişî bêmabên dewam kenê. Rejîmê Îranî mîyanê kurdan de kondoxî vila keno, kolberan kişeno. Sey dewleta tirke Îran zî vera Başûrê Kurdîstanî hêrişan keno. Xeberî vanê ke Îranî venga hêzanê Rojhelatî dayo ke çekanê xo war verdê. No qetî nêro qebulkerdene. Hêzê çekdarî heqo meşrû yê kurdan o.  Wezîfeyê ma yo ke Rojhelat de şarî birêxistin bikerê. Hêzê Rojhelatî zî ganî yewîya xo awan bikerê. Ma sey KNKyî na babete de xebatanê xo bizêdînê û seba ke polîtîkayanê rejîmî eşkera bikerê û dîyalogê zereyî aver berê tay semîner û panelan bikerê.

Başûrê Kurdîstanî

Dewleta tirke statuyê Başûrî tim hedef kena û wazena statuyê ci çin bikera. Hêrişê peyênî yê DAÎŞî zî ney mojnenê. Peyê hêrişanê DAÎŞî de hêzê îşxalkerî û nîjadperestê erebî estê. Babeta demokrasî û azadîyan de xeylêk meseleyê Başûrî estê. Bêusulîye ra koçî zêdîyenê. Her roje koçberê başûrijî sînoran de mirenê. Dewleta tirke zî wazena Başûrî veng bikera. Heyf ke hukmatê Başûrî na babete de gamêke nêeşte. 2 mengî verî Iraq û Başûr de weçînayîş ame kerdene. Rixmo ke zafê şarî tewrê weçînayîşî nêbi tay wekîlî ameyî weçînayene. Ma venga nê wekîlan danê ke seba xeta yewîye bixebitê, menfaatanê kurdan bipawê û vera îşxalkerî vengê xo berz bikerê. û vera îşxalkerî vengê xo berz bikerê. Hêrişê vera Şingalî zî dewm kenê. No dişmenîya vera kurdan û nefretê vera êzidîyan eşkera keno. Dewleta tirke wazena karo ke DAÎŞ nêmcet verda temam bikero. Ma vera hêrişan heta peynî hetê şarê Şingalî de binê. Ma dewleta tirke û hemkaranê ci zî şermezar kenê.

Rojawanê Kurdîstanî

Statuyê Rojawnaî qîmetîn o û ganî bêro pawitene. La hêriş û gefê dewleta tirke û Sûrîye yê vera Rojawanî dewam kenê. Rejîmê Sûrîye statuyê xo yê verênî de israr keno. Îdareyo Xoser vera gef û hêrişan xoverdayîşê xo rê dewam keno. Sey KNKyî ma seba pawitişê destkewteyanê Rojawanî bipawê û seba statuyê fermî yê Rojawanî bixebitê.

Asûrî, sûryanî û keldanîyî

Dewleta tirke û cergê ci vera asûrî, sûryanî û keldanîyan hêrişanê giranan kenê. Qederê înan û ê kurdan yew o. Coka KNK pawitişê nê şaran ra xo sey mesuldarî vîneno.

Wa PKK lîsteya terorî ra bêro vetene

Seba ke PKK lîsteya terorî ra bêro vetene, na babete de xebatî bêrê kerdene Înîsîyatîfê 'Kurdan rê Edaletî' ronîya û kampanyayî yenê kerdene.  1003 kesan zî kampanyaya 'PKK lîsteya terorî ra bêro vetene' îmza kerde. KNK paştî dano nê kampanya û xebatan û nê xebatan sey xebatanê xo vîneno.

Tecrîdê Îmraliyî

Seba ke tecrîdê vera Birêz Abdullah Ocalanî wedarîyo tay xebatî yenê kerdene. KNK nê xebatan sey xebatanê xo vîneno û nê xebatan de ca gêno. KNK rewşa tepişteyan ê sîyasîyan nêzdi ra teqîb keno û seba azadîya înan xebitîyeno. Ma serra 2021yî de bedel û vînîbîyayîşê pîlî dayî. Ma dişmen bin kerd. Ma wazenê serra 2022î bikerê serra serkewtişan. Nika firsendê ma her wextî ra zêdêr ê. Ma tewirê xo nê esasî ser o bigêrê û goreyê ney bixebitê.

Amadekarîyî

Heyeto Pêroyî yê KNKyî gulana 2022yî de do bêro yewca û seba amadekarîyan komîteyêke ameye awankerdene. Ma nê prosesî de pêro dezgeh, partî û kesayetan de pêvînayîşî bikerê. Dima zî ma xebatanê xo yê dîplomatîkan bikerê.''