Koçberanê kurdan Mehmet Bîlgeç, Mahmût Guler, Gokhan Dogûbey, Welat Kaya, Ramazan Tekmen, Şukru Ozturk û Mûrat Şahînî Zîndanê Xanthi yê Yunanîstanî de vera tecrîdê Îmraliyî dest pê grevê vêşanîye kerd.

Koçberan da zanayene ke seba ke ê paştî bidê grevê vêşanîye yê tepişteyanê dewaya PKK û PAJKî grevê vêşanîye kenê. Koçberan ard ziwan ke Rayberê Şarê Kurdî Abdullah Ocalanî 25 serrî yo Zîndanê Îmraliyî de tepişte yo û şexsê ey de vera kurdan polîtîkayê înkar û îmha yenê caardene.

Eşkerayîya koçberanê kurdan de ame parekerdene ke Rayberê Şarê Kurdî ra 33 mengan ra nata xeberêke nêameye girewtene. Koçberan vat: ''Ma netîceya faşîzmê vera kurdan de neçare mendê ke koçê Yunanîstanî bikerê. Ma sey koçbeeran tecrîdê vera Birêz Ocalanî şermezar kenê û grevê vêşanîye yê tepişteyanê xoverdayoxan selam kenê.''

Koçberanê kurdan dîyar kerd ke çalakîya înan do heta 15ê Sibata 2024î dewam bikera.