Şaristanê Cenevre yê Swîsre de, Zanîngehê Cenevre de çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de konferansê ''Dinya û Tirkîya de Tepişteyanê Sîyasîyan'' ame kerdene. 

Roniştişê peyênî yê konferansî de avûkatanê Rayberê Şarê Kurdî Abdullah Ocalanî ra Razîye Ozturk û Mahmut Şakarî û avûkatanê Baroyê Cenevre ra Olivier Peterî qisey kerd.

Hêverî Mahmut Şakarî qisey kerd û bale ante awankerdişê Zîndanê Îmraliyî ser. Şakarî qalê ci kerd ke Komployo Mîyanneteweyî bi sîstemê Îmraliyî dewam keno û vat: ''Abdullah Ocalan tepişteyê hêzanê mîyanneteweyan o. Awankerdişê sîstemê Îmraliyî de zî raşta raşte rolê Ewropa û Konseya Ewropa est bîyê. Ewro tecrîdê Îmraliyî şexsê Birêz Ocalanî de vera pêro kurdan yeno caardene.''

Razîye Ozturk îfade kerd ke vera Abdullah Ocalanî 25 serrî yo Îmrali de bêhuqûqîye yena kerdene û hîrê serranê peyênan de ey ra qetîyen xeberêke nêameye ghirewtene. Razîye Ozturk vat: ''Ma zaf reyî seba pêvînayîşan muracatan kenê la qetî cewab nêdîyeno muracatanê ma. Bêhuqûqîya Îmraliyî roje bi roje mîyanê komelî de yena vilakerdene. Ganî ma vera tecrîdî têkoşînêkê xurtêrî bikerê û wayîrê paradîgmaya Birêz Ocalanî vejîyê.''

Olivier Peterî dîyar kerd  ke seba ke tecrîdê Îmraliyî bêro şiknayene têkoşînêko hempar lazim o û vat: ''Ma eşkenê seferber bibê û na bêvengîye bişiknê. Dewleta tirke her ca de heqanê kurdan binpay kena û hêrişê kurdan kena. Ganî vera dewleta tirke tedayî bêrê kerdene ke wa a heqanê kurdan binpay nêkera. Sîstemê Îmraliyî eyneya huqûqê Tirkîya ya. Ganî qanûnî bêrê caardene û Abdullah Ocalan azad bibo.''

Peynîya konferansî de sîyasetmedare Jessica Carlqvista ke mîyanê Delegasyonê Seba Çareserîya Meseleya Kurdan û Vera Tecrîdî de cagirewtbî qisey kerd. Jessica pare kerd ke ganî her kes girîngîya azadîya Rayberê Şarê Kurdî fam bikero û seba azadîya ey têkoşîn bikero.

Peynî de pêro beşdaranê konferansîş posterê Rayberê Şarê Kurdî akerdî û sloganê ''Abdullah Ocalanî rê Azadîye'' vatî.