Paytextê Îtalya Roma de 11-12ê nîsane de ‘’Konferansê Abdullah Ocalanî rê Azadîye, Meseleya Kurdan rê Çareserîye’’ ame kerdene. Encamnameyo ke netîceya munaqeşeyanê ke konferans de ameyî kerdene ama hazirkerdene, ame wendene.

Encamnameyê konferansî de nê ameyî parekerdene:

''Xeylê welatan ra partîyanê sîyasîyan, sendîkayan, rêxitinanê cinîyan û ekolojî, rêxistinê huqûqî, aktîvîstanê haştîye, endamê Meclîsê Parlamenteran ê Konseya Ewropa, akademîsyen, rojnameger, rayberê dînî, doktor, û merkezanê sosyalî ra 360 temsîlkarî tewrê konferansî bîyî.

Tewrbîyayoxanê konferansî vengdayîşê Haştîye û komelê Demokratîkî yê  Rayberê Kurdî Abdullah Ocalanî yê 27ê sibate bi memnûnîyetê verwazî kenê û paştî danê ci. Reyna PKKyî 9 reyî adirbirnayîşo yewhet îlan kerdî, no zî mojneno ke hetê kurdan tim haştîye wazeno.Tewrbîyayoxê konferansî qesawet kenê ke hukmatê tirkî cewabê vengdayîşê Ocalanî nêda û adirbirnayîşê PKKyî tim yewhet manenê.

Tirkîya de hetêkî ra qala dewrê haştîye yena kerdene hetê bînî ra serekê şaredarîye, rojnameger, avûkat û aktîvîstê haştîye yenê destbendkerdene û tepiştene. No zî otorîterîya hukmatê tirkî mojneno ra.

Reyna hêrişê artêşa yê vera hêzanê gerîlayanê PKKyî dewam kenê û xeberê şuxulnayîşê çekanê kîmyewîyan newe ra kewtî rojdem.

Konferans  de xebatê kampanyaya azadîye ameye erjnayene û ame vatene ke kampanya Konseya Ewropa, CPT û hukmatê tirkî û dezgehanê eleqedaran ser tesîro sîyasî kerd. Bi nê çalakîyan fîkrê Ocalanî çar hetanê dinya ra vila bîyî.

Semedê çareserkerdişê meseleya kurdan azadîya Ocalanî hewce kena ke no zî verê demokratîkbîyayîşê kurdan akeno. Demokratîkbîyayîşê Tirkîya do Surîye, Rojawan, Iraq, Başûrê Kurdîstanî û pêro Rojhelatê Mîyanênî de zî tesîro pozîtîf bikero. Coka vengdayîşê Ocalanî semedê haştîye şasêk o.

Pêşnîyazê semedê çareserîya meseleya kurdan

Seba ke meseleya kurdan bi azadîya Abdullah Ocalanî yena çareserkerdene, gerek pêşnîyazê cerên bêrê caardene:

1. Gerek hukmatê Ewropa şirê Tirkîya ser ke bi azadîya Abdullah Ocalan prosesê haştîye yo cîddî bêro destpêkerdene.

2. Sey Îtalya seba ke heme dinya de hemwelatîya rûmete bidîyo Abdulah Ocalanî, cehdkerdişî bêrê hîrakerdene.

3. Paytextan de serkêşîya sendîkayan û têgêrayîşanê komelkî ra 1ê Êlule Roja Haştîya ya Dinya semedê Kampanyaya Azadîye bibo Roja Çalakîya Globale.

4. Semedê azadîya Ocalanî konser û semînerî bêrê organîzekerdene.

5.Ocalan sey namzedê Dîyarîya Haştîye ya Nobelî bêro ramojnayene.