Zulkuf Gezen Hepisxaneyê Tîpê T’yî yê Tekîrdagî de girewte bi û vera tecrîdê serê Rayberê Şarê Kurdî Abdullah Ocalanî çalakîya fedaîyîye viraşte. .

LONDRA

Îstansyonê Londra yo tewr qelebalix Kîngs Cross de xeylî Kurdistanijî ameyî têhet û çalakîye viraşte. Çalakîye de bale ancîyaye çalakîya fedaîyîye ya Zulkuf Gezenî ser û seba ke şehadetê neweyî nêqewimîye, ame waştene ke wa tecrîdê serê Rayberê Şarê Kurdî Abdullah Ocalanî bêro wedaritene. Çalakwanan fotografê xoverdayoxanê grevê vêşanîye girewtî xo dest û vera dewleta Tirkî sloganî eştî. 

MANNHEÎM

Bajarê Manheîmî yê Almanya de zî seba Zulkuf Gezenî, verê Garê Trene yê Merkezî de  mîtîng ame organîzekerdene. Mîtîng hetê Merkezê Komelê Kurdî yê Demokratîkî ra ame organîzekerdene. Mîtîng de çalakîya fedaîyîye ya Zulkuf Gezenî rê wayîrvejîyayîş ame kerdene û vera faşîzmê Erdogan û AKP’yî sloganî ameyî eştene. Verê posterê Zulkuf Gezenî de çilayî ameyî tafîstene û parlamenterê HDP’yî yê kanî Faysal Sariyildizî qiseykerdişêk kerd. Sariyildizî qiseykerdişê xo de va seba ke şehadetî hîna zêde nêbê ganî Kurdî bi pêroyî warizê payan ser û vera faşîzmê AKP-MHP’yî mucadeleyî hîna bikê berz.

HAMBURG

Bajarê Hamburgî yê Almanya de zî çalakîye ameye organîzekerdene. Çalakîye bi serkêşîya ciwanan, verê HBF Hamburgî de ameye destpêkerdene. Çalakîya ke seba Zulkuf Gezenî ameya organîzekerdene de zêderîya cinî û ciwanan bale ante û çalakwanan fotografê xoverdayoxanê grevê vêşanîye girewtî xo dest. Çalakîye de sloganê sey “Qetilkar Erdogan“, “Dîktator Erdogan“, “Şehîd bêmerg o“, “Biciwîyo xoverdayîşê hepisxaneyan“, “Kurdistan do faşîzmî rê bibo mezele“ ameyî eştene.

DUISBURG

Bi vengdayîşê Merkezê Komelê Kurdî yê Demokratîkî (MKKD), xeylî Kurdistanij û dostê ci verê Garê Trene yê Merkezî de ameyî têhet û mîtîng ame viraştene. Mîtîng de, yew îdarekarê MKKD’yî wina qisey kerd: “Heval Zulkuf Gezen bi na çalakîya xo bîyo sembolê çalakîyanê sey 14 Temmûze û xêza xoverdayîşê Newroze û nameyê xo tarîx de dayo nuştene. Ma soz danê ey ke ma do Rayberîye û Kurdistanî bikê azad û Tirkîyaya Demokratîke ya ke ey waştenê bikê awan.“ Girseye fotografê Leyla Guvene girewtî xo dest û sloganî eştî. Hemserekê ATÎK’î Suleyman Gurcanî zî qiseykerdişêk kerd û keyeyê Gezenî û şarê Kurdî rê serweşîye waşte û va ma ey bi hurmet yad kenê.

GRAZ

Bajarê Grazî yê Awusturya de zî Kurdî seba Zulkuf Gezenî vejîyayî meydanan. Kurdî bi organîzasyonê  MKKD’yî Haupplatz de, saet 17.00 de ameyî têhet. Vilawekê bi ziwanê Almankî ameyî wendene û seba ke 20’ê Adare de beşdarê programê Newroze bibê şarî rê vengdayîş ame kerdene.

BERLÎN

Seba ke bale biancîyo polîtîkayanê tecrîdî û çalakîya fedaîyîye ya Zulkuf Gezenî ser, Bajarê Berlînî yê Almanya de zî rayîrşîyayîşêk ame organîzekerdene. Arîf Dêrsimî bi nameyê Komîteya Tertîpî qiseykerdişêk kerd û wina va: “Grevê vêşanîye yê ke bi serkêşîya Leyla Guvene ameyê destpêkerdene, 4 mengî pey de verdayî û Zulkuf Gezen bi şehîdo verên. Ma verê çalakîya ey de bi hurmet vileyê xo kenê çewt. Qetilkarê Zulkuf Gezenî û ê şehîdanê bînan, dewleta Tirkî û îdarekarê ci Erdogan û faşîzmê AKP-MHP’yî yo. Ê wijdanê merdimahîye de ameyê mehkumkerdene.“ Rayîrşîyayîş de şarî posterê Leyla Guvene û ê xoverdayoxanê bînan girewtî xo dest û sloganî eştî.

HANNOVER

Bajarê Hannoverî yê Almanya de zî, bi serkêşîya Meclîsê Cinîyan ê Ronahîye çalakîye ameye organîzekerdene.Çalakîye de bale ancîyaye tecrîdê serê Rayberê Şarê Kurdî Abdullah Ocalanî ser û wina ame vatene: “Hukmatê Almanya, dewletê Ewropa yê bînî, Amerîka û pêroyê dinyaye, derheqê mergê hevalanê ma de sûcdar ê. Êdî sebrê Kurdan nêmendo. CPT û dewletê bînî ganî bêveng nêmanê. Hema nika wezîfeyê xo bîyarê ca û tecrîdî wedarnê.“

BORDEAUX

Bajarê Bordeauxî yê Fransa de, seba ke bale biancê çalakîya fedaîyîye ya Zulkuf Gezenî ser çalakîye ameye organîzekerdene. Çalakîye de şarî fotografê Rayber Abdullah Ocalanî, Zulkuf Gezenî, ê Leyla Guvene û xoverdayoxanê bînan girewtî xo dest û sloganî eştî.

TOULOUSE

Bajarê Toulouseyî de zî Kurdî û dostê ci, Meydanê Jean Jaûresî de ameyî têhet û mîtîng viraşt. Mîtîng de dostanê Kurdan ê Fransizan qisey kerd û vera tecrîdî paştdarîye daye Kurdan.

MARSÎLYA

Bajarê Marsîlya yê Fransa de zî Kurdî vera tecrîdî vejîyayî meydanan. Kurdî verê Temsîlkarîya Yewîya Ewropa ya Marsîlya de ameyî têhet û bale ante grevanê vêşanîye ser. Şarî posterê Ocalanî û Zulkuf Gezenî girewtî xo dest û vera faşîzmê AKP-MHP’yî sloganî eştî.

REÎMS

Bajarê Reîmsî yê Fransa de zî Kurdî vejîyayî meydanan. Kurdistanijan Place d’Erlon de stande akerde û derheqê Zulkuf Gezenî de vilawekî kerdî vila.

STOCKHOLM

Swêd de zî Kurdî vejîyayî meydanan û tecrîd protesto kerd. Kurdan roja Şemeyî de, merkezê Stockholmî de çalakîye organize kerdebî û vizêrî zî Garê Trene de reyna seba ke tecrîd bêro wedaritene yew çalakîye organize kerde. Komîteya Rojawanî ra Skutta Erîcsone paştdarîye daye Kurdan û seba ke tecrîdê serê Rayberê Şarê Kurdî Abdullah Ocalanî bêro wedaritene beşdarê çalakîye bîye. Erîcsone wina va: ”Ma kenê ke paştdarîye bidê xoverdayoxanê grevê vêşanîye. Vizêrî xoverdayoxan ra yew şehîd kewt. Ma kenê ke bikerê rojdemê Swêdî.” Çalakwanan ra Sîpan Garzanî bale ante çalakîya fedaîyîye ya Zulkuf Gezenî ser û wina va: “Ma seba ke çalakîya Gezenî û ê xoverdayoxanê grevê vêşanîye bikerê rojdemê Swêdî tîya de yê. Yew platformê ma yo ke cîya-cîya sazî û dergehê Swêdî tede ca gênê esto. Heta ke tecrîd bêro şikitene, ma do xo ver bidê.“

ZURÎH

Bajarê Zûrîhî yê Swîsre de zî, verê Konsolosîya Tirkîya de yew çalakîye ameye organîzekerdene. Polîtîkayê tecrîdî yê dewleta Tirkî û bêvengîya dewletanê Ewropa ameyî rexnekerdene.

BERN

Bajarê Bernî de meydanê Bahnplatzî de zî yew mîtîng û rayîrşîyayîş ame organîzekerdene. Ciwananê sosyalîst û çepgêranê Swîsre zî paştdarîye daye çalakîye. Beşdarwanan fotografê Zulkuf Gezenî girewtî xo dest û vera faşîzmê AKP’yî sloganî eştî. Mîtîng de Sîyasetmedar û parlamenterê HDP’yî yo kann Demîr Çelîkî qiseykerdişêk kerd û waşt ke paştdarîye bidîyo xoverdayoxanê grevê vêşanîye.

BASEL

Bajarê Baselî de zî, zereyê Îstasyonê Trene de çalakîye ameye viraştene. Çalakwanan sloganî eştî û bi ziwanê Almankî vilaweke wende.

LOZAN

Bajarê Lozanî yê Swîsre de zî, verê dêrê St. Laurentî de, Kurdan yew mîtîng organîze kerd. Parlamenter Jean Mîchael Dalîvo û parlamenter Ilîas Penchard beşdarê mîtîngî bîyî û qisey kerd. Parlamenteranê Swîsreyijan waşt hîna ke zaf kes nêmerdo tecrîd bêro wedaritene.