Bi wesîleya serrgêra 100. ya Pêkerdişê Lozanî  bi şîarê 'Serra 100. ya Pêkerdişê Lozanî de ma sey kurdan û kurdîstanijan Lozan de yê û ma Pêkerdişê Lozanî qebul nêkenê!' Salona Kongre ya  Beaulieuyî ya Lozanî de 22-23yê temmuze de konferansêk ame kerdene. 4 parçeyanê Kurdîstanî ra tewr tay 600 delegeyî tewrê konferansî bîyî.

Beşdaranê konferansî ra Hemserekê TEV-DEMî Garîp Hiso, Serekê Pêroyî yê Partîya Îslamî ya Kurdîstanî Hîkmet Serbilindî û sîyasetmedarê kurdî Osman Baydemîrî derheqê mana û girîngîya konferansî de ajansê ma rê ercnayîşî kerdî. 

Garîp Hisoyî pare kerd ke kurdan rîyê Peymana Lozanî ra bedelê giranî dayê û vat: ''Na peymane ra dima dewleta tirke hêrişê îşxal û qirkerdişî vistî dewre. Ma nê konferansî de ameyê têhet ke bimojnê ke ma na peymane qetî qebul nêkenê. Kurdî peymanêka winayêne wazenê ke tede îrade û heqê ci est bê.''

Hîkmet Serbilindî vat: ''Peymana Lozanî qederê kurdan na destê îşxalkeran. 100 serrî verî dewleta tirke binê nameyê Îslamî de kurdî xapitî û qir kerdî. Seba ke ma xeletîyanê sey verî nêkerê ganî yewîya xo ya neteweyîye bîyarê ca. Kurdî ganî statu de israr bikerê. Eke ma nê heqê xo nêpawê Homa do hesabê ney ma ra pers bikero.''

Sîyasetmedar Osman Baydemîrî vat: ''Ma hîrê konferansan de zî heman tewir mojna; yewîya neteweyîye. Serra 100. ya Peymana Lozanî de hînî kurdan de ferasetê yewîya neteweyîye virazîyayo. Partîyê sîyasî ganî vera Peymana Lozanî stratejî û têkoşînê hemparî bikerê. Konferansê ma zî bîyo gama ney a verêne. Teyna yewîya neteweyîye eşkena heqê texrîbatanê Peymana Lozanî ra bêra. Coka kurdî ganî îtîfaqê neteweyî û stratejîya neteweyîye awan bikerê û bîyarê ca.''