Bi wesîleya serrgêra 100. ya Pêkerdişê Lozanî  bi şîarê 'Serra 100. ya Pêkerdişê Lozanî de ma sey kurdan û kurdîstanijan Lozan de yê û ma Pêkerdişê Lozanî qebul nêkenê!' Salona Kongre ya  Beaulieuyî ya Lozanî de konferansêk yena kerdene. 4 parçeyanê Kurdîstanî ra tewr tay 600 delegeyî tewrê konferansî benê.

Beşdaran ra tayênan ajansê ma rê derheqê mana û girîngîya konferansî de qisey kerd.

Blesa Jahar Formana ke nameyê YNKyî ser o tewra konferansî bîya pare kerd ke Konferansê Lozanî seba ameyoxê kurdan zaf girîng o û ê do seba azadîya çar parçeyanê Kurdîstanî têkoşînê xo rê dewam bikerê. 

Endamê Komîteya Dîplomasî ya KNKyî Fîkret Îgrekî vat: ''Dewleta tirke wazena çarçewa Mîsak-i Mîllî de Rojawan û Başûrî zî îşxal bikera. Peymana Şingalî ya 2020î, îşxalê Serêkanîyê û Efrînî, tecrîdê Îmraliyî pêro parçeyê nê planî yê û Peymana Lozanî ya diyîne armanc kenê. Ma nê konferansî de kenê ke vera hêrişan û îşxalî stratejîya xo ya hempare awan bikerê.''

Sîyasetmedar Musa Farîsogullariyî vat: ''Konferansê Lozanî Peymana Lozanî red keno. Peymana Lozanî ra dima planê qirkerdiş, îmha û înkarê kurdan dîya destpêkerdene. Ma konferans de bi zelalî anê ziwan ke qetî na peymane qebul nêkenê. Coka no konferans tarîxî yo. Rixmê na peymane zî têgêrayîşê azadîye nê 50 serran de erjê pîlî vetî werte. Ganî ma nê erjan bivurnê azadîye û statuyêkî.''

Hemserekê KCDyî Berdan Ozturkî vat: ''Ganî ma prosesê verê ma de vera Peymana Lozanî têkoşînêkê tûjî bikerê. Lozan de startê qirkerdişê kurdan dîya û no qirkerdiş hema zî dewam keno. Birê ke nê konferansî de do bêrê dayene do prosesê verê ma roşnî bikerê. Ma nê konferansî de kenê ke planê qirkerdişî yê vera kurdan pûç bikerê.''

Hemserekê Dayîreyê Têkilîyanê Teberî yê Îdareyê Xoserî yê Rojawanî Abdulkerîm Omerî vat: ''Rixmê Peymana Lozanî ewro destkewteyê Başûr û Rojawanî ma rê hêvî yê. 100 serran de dewleta tirke nêeşkaye kurdan çin bikera û do nêeşka. Kurdî hînî sey verî nîyê. Hêz û dostê ma est ê. Birê nê konferansî zî do yewîya Kurdîstanî û ameyoxê Kurdîstanî rê xizmet bikerê.''