Kurdîstanijan serrgêra îmzakerdişê ci ya 101ine de Peymana Lozanî bi rayraşîyayîş û mîtîngî serkêşîya 36 dezgeh û rêxistinan de protesto kerde. 

Hêverî girseyî Lozan de heta verê warê Chateau d'Ouchyî rayraşîyayîş kerd.

Mîtîng de hêverî Hemsereka KCDK-E Zubeyde Zumrut qisey kerd û îfade kerd ke bingeyê hêrişanê îşxalî yê vera Kurdîstanî de ewro zî Peymana Lozanî est a. Zubeyde vat: ''Hêrişî û tecrîdê Îmraliyî na peymane ra paştî gênê. Ma do bi nê têkoşînê xo peymane çin bikerê. Ma na peymane qebul nêkerde û do nêkerê.''

Wekîla Parlamentoyê Federalî yê Partîya Sosyalîste ya Swîsre Laurance Fehlmann Riell zî çalakîye de qisey kerd û bale ante hêrişanê dewleta tirke û tecrîdê Îmraliyî ser.

Endamê Meclîsê Şaredarîya Lozanî David Payotî û Têgêrayîşê Grevê Cinîyan ê Swîsre ra Marion Novetî vat ke ê tim hetê têkoşînê azadîye yê kurdan de yê.

Rayraşîyayîşî ra ver tewr peyên nameyê PYDyî ser o Fuat Omerî qisey kerd û vat ke: ''Wa peynîya na şermîya se serran hinî bêra.''

Dima kurdîstanijan rayraşîyayîşê xo bi slogananê sey “Em Lozanê qebûl nakin”, “Dawî li şerma sed salî bînin”, “Bijî berxwedana Gerîla” û “Bijî Serok Apo” kerd.

Meydan de mîtîng ame kerdene. Mîtîng de hêverî Endamê Konseya Rayberdişî ya KCKyî Zubeyîr Aydarî qisey kerd. Aydarî hêrişê îşxalî û tecrîdî şermezar kerd û xoverdayîşê gerîlayan selam kerd.

Qiseykerdoxanê bînan zî Peymana Lozanî şermezar kerde û venga pêro kesan da ke vera hêrişanê îşxalî yê dewleta tirke têkoşînê hemparî bikerê.

Mîtîng bi sloganan qedîya.