Konferansê Ciwanan ê Dinya paytextê Fransa Paris de bi beşdarîya 95 dezgeh û rêxistinanê ciwanan hîrê rojan dewam kerd û vizêr bi deklarasyonêkî qedîya.

Deklarasyono ke hetê Torra 'Ciwanî Tarîxî Nusenê' ra ame dayene wina yo:

''Sey ciwananê dinya ma ewro sîstemêkê tewr çetinî de têrî manenê. Felaketê ekolojî beno giranêr, şerî gir benê, neteweperestî û têgêrayîşê faşîstî vila benê. Sîstemê kapîtalîzmî waranê cuye rijneno. Netîceya nînan de tecrîd, kişîyayîşê cinîyan, xizanî, şîdet û felaketê xoza qewimîyenê. Ewro ciwanê dinya vera nînan xo rêxistin kenê û hîna zaf têkoşîn kenê. Ciwanî gêrenê dinyayêka bîne û azade. Eke ma nika dest pê nêkerê, do key dest pêbikerê? Na çarçewe de ma sey Torra 'Ciwanî Tarîxî Nusenê' ameyî yewca ke têkoşînê hemparî aver berê.

Ma wazenê pîya nîqaş bikerê, xo perwerde bikerê û rêxistin bikerê. Coka sey 400 ciwananê 40 welatan û 95 rêxistinan ma nînan dîyar kenê: 

1. Çareserîya felaketanê nikayênan ancax bi demokrasî û edaletî mumkîn a.

2. Sey Torra 'Ciwanî Tarîxî Nusenê' ma seba averberdişê yewîya têkoşîn û xoverdayîşê dinya xebitîyenê.

3. Krîterê ma yo sereke yê rêxistinîye 'yewîye cîyarengîye de ya' yo. Îtîfaqê ma yo esas vera kapîtalîzmî yo.

4. Pratîkê ma yo hempar bingeyê enternasyonalîzmî de aver şino. Ma yewîya şaran sey erjêkê esasî vînenê.

5. Mapîya  vera zorbazîye, kapîtalîzm, lîberalîzm, ferdîperestîye, pederşahîye, talankerdişê xoza têkoşîn kenê.

6. Têkoşînê vera îşxalkerî û kolonyalîzmî de ma yew ê. Her komel wayîrê heqê xopawitişî û xoîdarekerdişî yo. Bi taybetî ma paştî danê nê heqan ê şarê Filîstînî û Kurdîstanî.

7. Ma faşîzmî sey dişmenêkê esasî yê merdimatîye pênase kenê.

8. Bi rêxistinîya ciwanan a xosere azadî mumkîn a.

9. Ma hetê şaranê têkoşeran de yê û paştî danê pêro têkoşînanê şorişgêran. Abya Yala ra heta Rojawanê Kurdîstanî, Şingalî ra heta koyanê Kurdîstanî û Asya ma herêmanê îdareyanê xoseran sey cepheyanê azadan hesibnenê. Pawitişê nê cepheyan û destkewteyan erk û mesuldarîya ma yê.

10. Ma do seba azadîya pêro tepişteyanê sîyasîyan û şorişgêran bixebitê. Na çarçewe de ma tewrê Hemleya 'Abdullah Ocalanî rê Azadîye, Meseleya Kurdan rê Çareserîye' benê.

Sey ciwanan ewro mesuldarîyanê ma yê tarîxîyan est ê. Ma do pabeyê sibayî nêvinderê, cuya azade ewro awan bikerê. Ma qerardar ê ke nê têkoşînî berz bikerê. Ewro kapîtalîzmî merdimatîye arda verê xeniqîyayîşî. Estbîyayîş û cuya ma bi çinkerdişê kapîtalîzmî û awankerdişê cuyêka alternatîfe mumkîn ê. Yewîya ruh û hêzî ya ciwanan seba têkoşînanê azadîye pêro dinya de lazim a. Ma mîrasê vengdayîşê Manîfestoyê Komunîstî 'Karkerê dinya bibê yew!' vejîyenê û wina veng danê: Ciwanê dinya yew bibê û pîya dinya bivurnê.''