Emser Almanya de şayîya Newroze ya merkezîye ancî Frankfurt de, Rebstockpark 23yê adare de do bêra viraştene.

Endamê Komîteya Amadekarîye ya Newroze ya Frankfurtî û Hemserekê KON-MEDî Kerem Gokî ANFyî rê qisey kerd û pare kerd ke seba ke Frankfurt werteyê Almanya de yo û tede meseleya parke çin a Newroza merkezîye nê şaristanî de yena fîrazkerdene.

Gokî ard ziwan ke emser çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ê Newroze fîraz kenê û şîarê Newroze zî 'Newroza Azadî ya, Azadîya to, Azadîya ma ya' yo.

Kerem Gokî îfade kerd ke Newroze roşanêko neteweyî yo û vat: ''Xeylêk hunermendî do tewrê Newroze bibê. Ma do seba domanan warê kaykerdişî, standanê kitaban û kincan, werdeyanê herêmîyan û awe virazê. Ancî standan de nuştoxî do kitabanê xo îmza bikerê.

Ma do Newroza emserîne de polîtîkayanê krîmînalîzekerdişê kurdan û hemkarîya dewleta tirke yê Almanya rê cewab bidê. Ma wazenê wa hinî dewletê Ewropa statuyê kurdan bişinasnê. Newroze emserîne de ma do azadîya Rayberê Şarê Kurdî Abdullah Ocalanî biwazê. Ma venga pêro kurdîstanijan, şorişgêran, dostanê xo û şarê almanan danê ke tewrê Newroza Frankfurtî bibê. Ma pîya vera qirkerdişê kulturel û fîzîkî meydan de vengê xo berz bikerê.''