Mayê Şemeyî: Ma do vera tedayan sereyê xo nêarê war

Mayanê Şemeyî pare kerd ke Meydanê Galatasarayî înan rê yeno qefilnayene û ê hertim yenê destbendkerdene la rixmê ney zî têkoşînê xo ra fek vera nêdê.

Çalakîya Mayanê Şemeyî hewteyê 949. de dewam kerd. Rixmê bira 'binpaykerdişê heqî' ya Mehkemeya Qanûnê Bingeyî (AYM) zî polîsan reyna warê çalakîya Mayanê Şemeyî Meydanê Galatasarayî girewt binê ablûqa. Polîsanê tirkan 14 Mayê Şemeyî û pawitoxê heqanê merdiman destbend kerdî.

Komîsyonê Vînîbîyayeyan ê ÎHDyî yê Îstanbulî bînaya xo de kombîyayîşê çapemenîye kerd û xeylêk kesî tewrê ci bîyî.

Endama Komîsyonî Masîde Ocak kombîyayîş de qisey kerd û ard ziwan ke qerar û prensîbê AYMyî çin hesibîyenê. Ocake venga îqtîdarî da ke goreyê biranê mehkeme têbigêro. Ocake bale ante Feryale Çetîn ser ke merdimê ci Îbrahîm Çelîk hetê Hîzbullahîra kişîyabî û vat: ''Bi serran o Feryale gêrena gorê merdimê xo. La endamê Hîzbullahî kewtî Meclîsî.''

Aytene Morsumbul da zanayene ke cigêrayîşê vînîbîyayeyan sûc nîyo û vat: ''Ma do Meydanê Galatasarayî ra fek vera nêdê. Wa embazê ma vera bidîyê.''