Mehkemeya Almanya derheqê muracatêkê bextwaştişî de birêka nimûne daye. Mehkeme hukm da ke Hesekêya ke binê kontrolê Îdareyê Xoserî yê Rojawanê Kurdîstanî de ya, seba sivîlan cayêko asayî yo.
Goreyê xebera DWyî Mehkemeya Îdareyî ya Berze ya Munsterî (OVG) 16ê temmuze de derheqê muracatêkê bextwaştişî de birêka nimûne daye. Mehkeme hukm da ke Hesekêya ke binê kontrolê Îdareyê Xoserî yê Rojawanê Kurdîstanî de ya, seba sivîlan cayêko asayî yo.
Goreyê xebere keso ke Hesekê ra bi û wayîrê dewa bi, verê cû sey endamêkê şebekeya bazirganîya merdiman Avusturya de hukm werdbi û 2014 de derbazê Almanya bîyo. Nê kesî muracatê Dayîreyê Multecîtîye û Koçberîye yê Federalî kerdo û dewleta Almanya ra bext waşt.
Dayîreyê Multecîtîye û Koçberîye yê Federalî waştişê multecîtîye red kerd. OVGyî zî dayîre heqdar dî. OVGyî sebebê bire de vat ke Hesekê de hêrişê dewleta tirke û cerganê DAÎŞî est ê la tehlukeyê kişîyayîşê sivîlan çin o.
