Paytextê Almanya Berlin de bi beşdarîya roşnvîr, akademîsyen, nuştox, rojnameger û sîyasetmedaranê Tirkîya ''Konferansê Haştîye, Dîyalog û Demokrasîyî'' ame kerdene. Netîcenameyê konferansî ame eşkerakerdene. Akademîsyene Latîfe Dogan û rojnameger Ertugrul Mavîogluyî netîcename wend.

Mavîogluyî da zanayene ke konferans de têkoşînê haştîye ser o tecrubeyê mîyanneteweyîyî ameyê parekerdene, tecrîdê Îmraliyî yê vera Rayberê Şarê Kurdî Abdullah Ocalanî ameyo nîqaşkerdene û vat: ''Azadîya Abdullah Ocalanî teyna waştişê şarê kurdî ney waştişê pêro şaranê herême yo.''

Mavîogluyî pare kerd ke konferans de seba averberdişê têkoşînê haştîye birî ameyî girewtene:

''-Konferansê ma armanc keno ke tecrubeyê têgêrayîşanê cinîyan ra îstîfade bikero. Mîmarê Felsefeya Jin, Jiyan, Azadî nika tecrîdê mutleqî de yo ke no tecrîd tesîrê cinîyan zî kenı. Heta ke tecrîd nêqedo şansê ma yê haştîye zî do çin bo.

-Qewimîyayîşê tarîxî û sîyasîyî rewşa Birêz Abdullah Ocalanî û meseleya kurdan binê demokrasî û azadîye de do bêrê çareserkerdene. Forumê Azadîye û Haştîye yê Ewropa ganî pêro xebatanê xo seba çareserîya meseleya kurdan, haştîye û muzakerayan bikero.

-Seba haştîyêka mende ganî arşîvêkê vîrê cigêrayîşanê haştîye do virazîyo û ziwanêko haştîyane yo hîra virazîyo. Seba ney konferansê ma do kampanyayan û xebatan bikero.

-Forumê ma seba zêdînayîşê hêvî û kelecanê haştîye û berzkerdişê vengê haştîye konseri festîvale, kampanya, kombîyayîşan virazo.''