NAV-DEM: Bi adirê Newroze ma tecrîdî bişiknê
NAV-DEM’î Newroze pîroz kerde û semedê tewrbîyayîşê Newroza Franfurtî ya 23'ê Adere vengd da ke heme şarê Kurdî û dostê înan tewrê Newroze bibê vera zulmî vengê xo berz bikerê.
Merkezê Cimatê Demokratîkî yê Kurdan ê Almanya (NAV-DEM) seba Newroze peyamêk weşana.
Peyamê NAV-DEM’î de nê ameyî vatene:
“Bi ruhê xoverdayîşê ‘Ma tecrîdî bişiknê, faşîzmî birijnê û Kurdistanî azad bikerê’ ma do Newroza emserî 23’ Adare de Frankfûrt de pîroz bikerê. Şarê Kurdî û Têgêrayîşê Azadîye vera faşîzmê AKP-MHP û DAÎŞ’ê bedelê girdî dayî û têkoşînê azadîye yê tarîxkî ray ra benê. Ma Newroze bi ruhê fedaî yê Zulkuf Gezenî, bi ruhê xoverdayoxanê grevê vêşanîye pîroz kenê. Ganî heme şarê ma, pabesteyê ma dost û temsîlkaranê dezgehanê cimatî dawetê Newroze bikerê û eynî wext de ganî nê çalakîyê seba wayîrvejîyayîşê grevê vêşanîye zî bêrê xurtkerdene.”
Peynîya eşkerayîye de ame vatene ke Newroza emserî de destûrê standan zî ameyo dayene û ganî her kes teba keyeyan, cîranan û nasanê xo tewrê Newroze bibê.
