Çalakîya ''Seba Ocalanî Azadîye'' ya ke şaristanê Strasbourgî yê Fransa de bi hawayêkê bêmabênî dewam kena hewteyê 389. de ya. Her hewte komêke çalakîye dewam kena. Nê hewte zî Mehmet Okan, Turan Sonmez, Serhat Cîzrelî ûTaşdemîr Anli yê ke Parîsî ra ameyî nobete girewte.

Nameyê koma Parîsî ser o beyanat ame dayene û ame parekerdene ke seba azadîya Rayberê Şarê Kurdî Abdullah Ocalanî çalakîye do bi hawayêkê xurtî dewam bika. Beyanatî de ame parekerdene ke Ocalanî beno ke bi bedenê xo tîya de nîyo la bi fikranê xo her ca de yo û wina ame vatene: "Na çalakîye yena manaya pabestîya Rayberîye û hetê tarîxî ra girîng a. Ganî pêro dinya bivîna ke kurdî senî bisebrî têkoşîn kenê."

Beyanatî de venga Konseya Ewropa û CPTyî ame dayene ke ganî berpirsîyarîya xo bîyarê ca û ame vatene ke ''Konseya Ewropa û CPT her roje ma vînenê. Hînî ganî waştişê şarê kurdî yê seba rayberîye bîyarê ca."