Vernîya Konseya Ewropa (KE) ya ke bajarê Strasbourgî yê Fransa de ya çalakîya Nobeta Ocalanî rê Azadîye ya ke nizdîyê 7 serrî yo dewam kena, no hewte hetê cinîyanê ke paytextê Fransa Parîs ra ameybî ameye dewrgirewtene.

Hewteyê ravêrteyî de çalakî hetê grûbêka hîrê kesan a bajarê Olderburgê Almanya ra ameyêne rayraberdene. Grûba nê hewteyî de endamê Têgêrayîşê Cinîyan ê Parîsî Eylem Fîrare, Şenay Ayhane û Hatîce Kutuke ca gênê.

Şenay Ayhana ke bi nameyê grûbe qisey kerd, bale ante serê tecrîdê girankerdeyî yê serê Rayberê Şarê Kurdî Abdullah Ocalanî. Ayhane vat ke serdana Komîteya Vernîgirewtişê Îşkenceyî (CPT) ya ke pabesteya KE ya qewimîyayîşêko rind o, la hewna kes nêeşkeno vajo ke tecrîd qedîyayo.

Çalakîya Nobeta Ocalanî rê Azadîye ya ke 25’ê Hezîran a 2012’î de dest pêkerda ra heta bi ewro nizdîyê 2 hezarî Kurdistanij û Ewropayijî tewrê ci bîyî. Çalakîya de, ke heman wextî de cayê ci nizdê banê CPT yo, her roje bi desan kesan dir rasterast pêvînayîşî yenê kerdene û derheqê fikranê Ocalanî û mucadeleyê azadîya şarê Kurdî de hayîdarîyî yenê dayene.