Paytextê Fransa Paris de 9ê çeleyê 2013 de Sakîne Cansiz, Fîdane Dogan û Leyla Şaylemez û 23ê kanûna 2022yî de Evîne Goyî, Mîr Perwer û Abdurrahman Kizil ameyî qetilkerdene. Serkêşîya TJK-E û KCDK-E ewro Paris de nê wird qirkerdişî ameyî protestokerdene.

 Rayraşîyayîş de yo ke  Gare du Nordî ra ver bi Meydanê Republique ame kerdene, sloganê sey  "Şehîd Namirin", "Bijî Serok Apo", "Kiştoxê eşkera yê Fransa qey bêveng a" ameyî vatene û xoverdayîşê QSDyî ame selamkerdene.

Gare du Nordî ra ver bi Meydanê Republique rayraşîyayîş ame kerdene, Badê rayraşîyayîşî semedê şehîdan rêz ame girewtene û dima Hemsereka KCDK-E Zubeyde Zumrut  tîya qisey kerd. Zumrute veng da Fransa ke wa qirkerdişan roşn bikero û vat heta caardişê edaletî têkoşînê înan do dewam bikero.

Bi nameyê Şaredarîya Parisî zî Genevieve Garrigos nê vatî: ''12 serrî yo cigêrayîşê ma yê edaletî dewam keno. Paris eynî wextî bajarêkê kurdan o. Ma wazenê pîya kultur û erjanê xo bipawê. Ma pîya bi kurdan ê. Ganî ma wayîrê têkoşînê kurdan bivejê. Kurdan vera DAÎŞî têkoşîno gird kerd.''

Keyeyanê şehîdan zî veng da Fransa ke wa edalet bêro caardene û vat kiştoxê xora bewlî Fransa qey bêveng a.

Wekîla verên a HDPyî Dîlane Dîrayet Taşdemîr zî ard ziwan ke têkoşînê şehîdan çar parçeyanê Kurîdstanî de yeno domnayene û vat ê do vatişê 'jin jiyan azadî' rê dewam bikerê.

Vervatoxa TJK-E Aytene Kaplan zî veng da Fransa ke wa berpirsîyarîya xo bîyaro ca û vat hinî bes o wa edalet bêro caardene û kiştoxî bêrê muhakemekerdene.

Endamê Konseya Rayberdişî ya KCKyî Zubeyr Aydar zî ard ziwan pe peyê qirkerdişan de dewleta tirke est a û vat heta kiştoxî bêrê qetilkerdene têkoşîn do dewam bikero.

Reyna xeylê sîyasetmedaranê fransizan zî qiseykerişê xo de semedê caardişê edaletî vegn da û mesajê paştdayîşê kurdan dayî.

Koma Hunera Mizgin zî bi deyîranê xo şorişgêran tewrê mîtîngî bîye.