Wekîla sosyalîste ya Swêdî Amînehe Kakabaveh vizêr roniştişê Parlamentoya Swêdî de waşt ke wa Polîsê Asayîşê Swêdî (SAPO) teda û krîmînalîzekerdişanê kurdan ra fek vera bidê.

Kakabavehe  qanûno ke semedê endamanê DAÎŞî amebi amadekerdene la vera kurdan şuxilîyeno rexne kerd û îfade kerd ke kurdan DAÎŞî bin kerd, Rojawan de xo rê îdareyêke naro la Swêdo ke parçeyê koalîsyonê mîyanneteweyî ya Rojawan û Başûrê Kurdîstanî de paştî nêdano kurdan.

Kakabavehe da zanayene ke kurdî Swêd de semedo ka medyaya komelkîye de pê parekerdişan paştî danê YPG, YPJyî hetê SAPOyî ra yenê teqîbkerdene. Kakabavehe rexne kerd ke parekerdişê medyaya dîjîtale azadîya fikr û îfadeyan a.

Kakabavehe eşkera kerd ke SAPOyî wexto ke îfadeyê Zozane Buyuk girewtêne paştdayîşê seba HDPyî sey sûcêkî mojna û Zozane rê teda kerde. Kakabavehe pare kerd ke derheqê 30 kurdan de dosyayê winasênî ameyî amadekerdene ke sînorî ra bêrê teberkerdene.

Kakabavehe vat: ''Çîyê ke Tirkîya kurdan rê kena Swêd de SAPO kurdan rê keno. SAPO û Tirkîya hemkarîye kenê. Resul Ozdemîr pê waştişê Tirkîya sînorî ra ame teberkerdene. Hukmatê Swêdî zî verî pê waştişê Tirkîya PKK û PAJK girewtbî lîsteya terorî. Sûrîye ra 30 cinîyê DAÎŞijî pa domananê xo pê hetkarîya Wezaretê Karanê Teberî ameyî Swêdî. Çira DAÎŞijî peygoş benê la kurdî krîmînalîze benê?''