Wekîlanê SPOyî bi nameyê ''Dewaya qefilnayîşê HDPyî'' vernîyazêkê persî da û Parlamentoyê Avusturya de vernîyaz ame qebulkerdene. Parlamentoyî venga hukmatî da ke seba demokratîkbîyayîşê Tirkîya xîre bikero.
Avusturya de wekîlanê Partîya Sosyale-Demokrate (SPO) Katharina Kucharowits û Petra Bayrî vernîyazê bi nameyê 'Dewaya qefilnayîşê HDPyî' pêşkêşê komîsyonê cigêrayîşî yê parlamentoyî kerd.
Vernîyazo ke waştişê paştdayîşê bi HDPyî hukmatê Viyana ra wazeno, endamanê hukmatî yê komîsyonî zî paştî daye ci. Vernîyaz hetê Parlamentoyê Avusturya ra ame qebulkerdene. Parlamentoyî sere de Wezîrê Karanê Zereyî yê Ewropa venga hukmatê Karl Nehammerî da ke bi mesuldarî têbigêro.
Bire de ame parekerdene ke seba ke Tirkîya demokratîk û dewleta huqûqî biba ganî hukmat xîret bikero û ganî HDP nêro qefilnayene.
Bire de ame vîrvistene ke HDP hîrêyîn partîya pîlêre ya Tirkîya ya û wina ame vatene: ''Eke HDP bêro qefilnayene Tirkîya do huqûqê mîyanneteweyî û peymananê ke îmza dayê ci binpay bikera.''
Metnê bire yê parlamentoyê Avusturya de seba temsîlîya sîstemê pirterefî yê Tirkîya estbîyayîşê HDPyî ame nîşankerdene û ame vatene ke sûcdarîyê mehkemeya tirkan ê vera HDPyî bêbinge yê.
