Polîtîkayê hêriş û îşxalî Parlamentoyê Yewîya Ewropa de yê. Raportorê Tirkîya yê Yewîya Ewropa Nacho Sánchez Amorî vera hêrişanê îşxalî yê dewleta tirke yê vera Başûr û Rojawanê Kurdîstanî nêrazîbîyayîş mojna.
Kombîyayîşê pêroyî yê Parlamentoyê Yewîya Ewropa de têkilîyê bi Tirkîya ameyî ercnayene. Roniştişê parlamentoyî de Raportorê Tirkîya yê Yewîya Ewropa Nacho Sánchez Amorî qisey kerd û vat: ''Rolê Tirkîya yo jeopolîtîk se beno wa bibo Yewîya Ewropa wa verê binpaykerdişê heqan de bêveng nêmana.''
Nacho Sánchez Amorî ard ziwan ke dewleta tirke rewşa xo ya jeopolîtîke vernîya heqanê merdiman û demokrasî de nana ro û vat: ''Asta demokrasî ya Tirkîya zaf apey şîya. Tirkîya partîya tewr hîrêyîne ya tewr pîle HDP ser o tedayanê pîlan kena û partîye sey 'îlegalî' mojnena. Reyna şerê Ukrayna û Rûsya xo rê kena firsend û xo sey aktprêka asayîşî mojnena.''
Amorî bale ante krîzê mabênê Fînlandîya-Swêdî-Tirkîya ser û vat: ''Meseleya Tirkîya bi nê wird welatan çin a, meseleya ci bi demokrasî est a.'' Amorî îfade kerd ke Tirkîya Rojawan û Başûrê Kurdîstanî de pozîsyonê îşxalkeran de ya.
Wekîlan ra Serekê Delegasyonê Syriza Dimitrios Papadimoulisî zî da zanayene ke eke ê wazenê Tirkîya de demokrasî aver şora wa vera Erdoganî tewir bigêrê.
Endamê Partîya PASOKî Nikos Androulakisî zî veng da ke wa vera Tirkîya ambargoyê çekan bêro kerdene.
