Partîya Komunîste ya Fransa (PCF) vera hêrişanê îşxalî yê dewleta tirke 11ê hezîrane de rayraşîyayîşanê 'Pawitişê Kurdîstanî' do bikera. PCFyî venga her kesî da ke tewrê rayraşîyayîşan bibo.
Hetkarê Berpirsîyatê Sektorê Mîyanneteweyî yê Rojhelatê Mîyanênî û Magrebî yê OCFyî Pascal Torreyî bi sernameyê 'Vera îşxalê tirkan ma Kurdîstanî bipawê' eşkerayîyêke daye.
Eşkerayîye de bale ameye antene têkoşînê Rojawanî yê vera DAÎŞî ser û ame îfadekerdene ke dewleta tirke Rojawanî rê gefan wanena û HDPyî ser o teda kena. Eşkerayîye de ame parekerdene ke Erdogan wazeno şerê Rûsya-Ukrayna bivurno firsendêk û reyna hêrişê kurdan bikero. Eşkerayîye de ame vatene ke dewleta tirke Başûr û Rojawanî ser o bombayan varnena û şarê sivîlî qetil kena.
Eşkerayîye wina dewam kena: ''Kurdan têkoşînê vera tarîtîye û seba pawitişê azadîya demokratîke bedelê giranî dayî û ê hê danê. Ê temsîlkarê haştîye û edaletî yê. Kurdî hewceyê paştdayîşê mîyanneteweyî yê. Komunîstî kurdan reyde yê û seba ke paştî bidê kurdan 11ê hezîrana 2022yî de roja şemeyî Fransa de do çalakîyan bikerê.''
Bernameyê çalakîyan wina yo:
Paris, 14.00, Place de la République
Marsilya, 14.00, Réformé Canebière
Montpelier, 19.00, Parc Payreu
Toulouse, 14.00, Gare Matabiau
Bordeaux, 14.00, Grand Théâtre.
