Roja verêne ya konferansê Parlamentoyê Ewropa (PE) ameye kerdene, koma Keskan, Îdareyê Xoserî yê Vakur û Rojhelatê Sûrîye û Îtîfaqê Pawitişê Azadîye û Heqanê Merdiman ê Mîyanneteweyî (AIDL) konferans serûber kerd. Eleqayê zêdeyî ra zaf kesan cayêk peyda nêkerd.

Konferans de nameyê Koma Îtîfaqê Azadîye ya Keskan-Ewropa Parlamenter ser o François Alfonsîyî qisey kerd û vat: "Ez Hevrîn Xelefa ke hetê dewlete tirke ra ameye qetilkerdene yad kena. Ganî a tîya de bibîyêne, bi hawayêkê sembolîkî ma ci rê cayêk amade kerd." Alfonsoyî vat ke ganî dewleta tirke seba sucanê xo yê şerî bêra hukmkerdene. Alfonsîyî wina dewam kerd: "Ganî Ewropa derheqê kurdan de wayîrê zanayîşî biba. Bi taybetî bi îşxalkerdişê Efrînî rewşa uca bîye giran. Seba azadîye û ameyoxî ma têkoşînê înan reyde yê."

Hemsereka Îdareyê Xoserî yê Vakur û Rojhelatê Sûrîye Mizgîne Amed pare kerd ke dewleta tirke wazena demografîyê herême bivurna, sîstemê demokratîkî yê Rojawanî çin bika. Amede vat ke bi nê konferansî hêvî kenê ke îşxalê tirkan do bêro vindartene, koçberî do abigêrê û sucê şerî mehkemeya mîyanneteweyî de do bêrê hukmkerdene.

Nameyê AIDLî ser o Gauîllaume Tournîerî qisey kerd û vat: "AIDL venga Ewropa dano ke bi pirsîyarîya pawitişê welatî û dezgehan wurza payan ser. No têna wazîfeyêk nîyo, wayîrvejîyayîşê astêka cuye yo. Ganî Ewropa paştê xo çîyo ke ewro Vakur û Rojhelatê Sûrîye de qewimîyeno ro nêzivirno."

Roniştişê destpêkî de moderatorîya endamê Konseya EUTCCyî Michael Gunterî de derheqê îşxalê tirkan, pakîya etnîke ya Rojhelatê Mîyanênî, tewirê NYyî, NATO, YE û koalîsyonê mîyanneteweyî yê vera DAÎŞî, sucê vera merdimîye yê dewleta tirke û şantajê multecîyan ê dewleta tirke de semînerî ameyî kerdene.

Wezîrê Karanê Teberî yê Verênî yê Fransa û Hemserekê Rêxistina Doktoranê Sînornênasan Dr. Bernard Koucherî qisey kerd û vat: "Serebûtê ke Vakur û Rojhelatê Sûrîye de qewimîyenê barbarîye ra ber çîyêk nîyê. Paştdayîşê min ê bi kurdan her tim esto û mende yo."

Parlamenterê Qibrisî Costas Mavrîdesî vat: Ganî Rojawan û Yewîya Ewropa bizanê ke tirkan sucî polîtîze kerdî. Operasyonê Qibrisî rê vatêne 'operasyonê haştîye'. Seba operasyonê Rojawanî zî wina vanê. Dima zî dest pê îşxalî kenê. Na pakîya etnîke ya. Stratejîya Erdoganî felaketêkê merdimîye ya. Ganî destûr nêro dayene ke dewleta tirke bêceza bimana."

Rojnamegerê Arabîstana Siûdîyî Suleyman Ansarî qisey ker û vat: "Erdogan gef ro pêro dinya waneno. Dîktatorîya ci manena yê Hîtlerî û Musollînî ya. Erdogan paştî dano terorîstanê DAÎŞî. Ma vera îşxalê dewleta tirke yê."

Wezîrê Verênî yê Multecîyan ê Yewnanîstanî Loannîs Mouzalesî vat: "Eke îşxalê dewleta tirke nêbibîyêne Rojawan do bibîyêne cayêko weş. La heyf ke îşxalê dewleta tirke bi. Yewîya Ewropa zî seba multecîyan pere dana Tirkîya la seba multecîyanê Rojawanî çîyêk nêkerd. Ganî Yewîya Ewropa muşahedekaran bierşawê herême."

Konferans ewro do dewam bikero.