Heyetê HDPyî Bruksel de tay pêvînayîşê dîplomatîkî kerdî. Heyet de Hemserekê HDPyî Mîthat Sancar, Hemvervatoxê Komîsyonê Têkilîyanê Teberî Feleknase Uca û Dr. Hişyar Ozsoy û Temsîlkarê HDPyî yê Ewropa Dervîş Çîmen est bîyî.

Heyetî Hetkarê Serekê Parlamentoyê Ewropa yê Partîya Sosyalîste ya Ewropa (PES) û Serekê Îtîfaqê Averşîyayîşî (Syriza) Eurogroup Dimitris Papadimoulisî de pêvînayîş kerd. Dimitris Papadimoulisî pêvînayîşî ra dima mesajêk weşana û pare kerd ke vera polîtîkayanê hêrişkeran û otorîteran ê rejîmê Erdoganî, ê paştî danê HDPyî.

Nameyê PESî ser o eşkerayîyêke weşanîyaye û wina ame vatene: ''PES pêvînayîşê paştdayîşê seba HDPyî ra dima eşkera keno ke HDP sey rêxistinêka sîyasî ya demokratîke ya Tirkîya, seba meşrûyîya heqanê merdiman û serdestîya huqûqî têkoşîn keno. PES partîya wayûbira ya HDPyî û hêzanê demokratîkan ê Tirkîya ya.

Dimitris Papadimoulisî zî mesajê xo de îfade kerd ke ê bi xurtî paştî danê HDPyî. Dimitris Papadimoulisî peynîya mesajê xo de bale ante hêrişanê îşxalî yê dewleta tirke yê vera Başûr û Rojawanî ser û da zanayene ke înan HDPyî reyde lazimîya xîretanê haştîye ser o pêkerdo.