Nuştoxa îtalyane Laura Schradera ke bi serran o seba têkoşînê azadîya kurdan xebatan kena kitabê xo yo hîrêyîn "Berxwedan: La Resistenza Del Popolo Kurdo Contro Il Genecidio Di Erdigan" (Berxwedan: Xoverdayîşê Şarê Kurdî yê Vera Qirkerdişê Erdoganî) weşana. Laura verê cû zî kitabê I Fuochi del Kurdistan (Adirê Kurdîstanî) û Civilta e Verita (Şaristanî û Heqîqet) weşanabî.

Laura Schrader derheqê kitabê xo yê peyênî û têkoşînê Rayberê Şarê Kurdî Abdullah Ocalanî de ANFyî rê qisey kerd.

Laura Schrader da zanayene ke Abdullah Ocalan asta Nelson Mandela, Luther King û Gandhi de yew lîder û fîlozof o. Laura vat: ''Tecrîdê vera Abdullah Ocalanî sûcê vera merdimatîye yo. Paradîgmaya Ocalanî seba pêro merdimatîye modelê cuya hempare yo û eşkena verê şeranê dinya bigêra.Têgêrayîşê Jin, Jiyan, Azadî yo ke bingeyê Şorişê Cinîyan o û destpêkî ra nata armancê PKK û Abdullah Ocalanî yo.''

Nuştoxa îtalyane Laura Schrader îfade kerd ke a wazena kitabanê xo de xîtabê her kesî bikera û vat: ''Mi metodêkê bi nameyê 'empresyonîstî' weçîna. Hîkayeyê kitabê mi bi giranî derheqê rijnayîşê Sûrî, îşxalê Efrînî, portreyanê sey Sakîne Cansiz, Fîdane Dogan, Selahattîn Demîrtaş, Hevrîne Xelef û Erdoganî de yê. Estbîyayîşê Abdullah Ocalanî pêro kitabî de est o. Çunke peyê xoverdayîşê kurdan ê heybetînî de teyna yew name est o û o zî Abdullah Ocalan û fikrê ci yê. Tecrîdê vera Abdullah Ocalanî sûcêko mîyanneteweyî yo.''